Elorda ákimi Altai Kólginov kezekti ret problemaly turǵyn úi nysandaryn aralady, dep habarlaidy "Ult aqparat" ákimdikke silteme jasap.
Nur-Sultan ákimi 30 shilde kúni keshke aldymen «Jeti jol» turǵyn úi kesheniniń (Kóktal kenti) qurylys alańyna at basyn tiredi. Atalǵan úidiń qurylysy 2013 jyly bastalǵan, 2015 jyly nysan problemaly dep tanylǵan. Úleskerlerdiń sany – 600 adamǵa jýyq.
Qurylys qarqynynyń baiaýlyǵyn baiqaǵan Altai Kólginov: «Úsh apta buryn kezdestik. Qurylys baiaý júrip jatyr. Maǵan jumys qarqyny unamaidy. Bastaǵannan keiin aiaqtaý kerek. Eger siz de osyndai ustanymdy ustansańyz, sizdiń aldyńǵy qurylys salýshydan esh aiyrmashylyǵyńyz bolmaidy ǵoi. Biz sizge jobalaý jumystary boiynsha kómektesip, barlyq máselelerdi zerdelep otyrmyz. Tezdetý kerek, qurylys maýsymy aiaqtalyp qaldy», - dep keiistik tanytty.
Ekinshi obekt - «Komfort» turǵyn úi kesheni boldy. Bul nysan 2015 jyly problemaly bolyp tanylǵan. Úleskerlerdiń sany – 227 adam. Qurylys salýshy atalǵan nysanda jumys júrgizilip jatqanyn, jumysshylardyń ekinshi aýysymy týraly másele qaralý ústinde ekenin atap ótti. Qazirgi kezde olar injenerlik jeliler jobasyn kútýde.
«Bul qarqyndy toqtatpańyz. Qysqa merzimde nátije kórsettińiz, jumys júrgizilgeni baiqalady. Injenerlik jelilerdiń jobasyn alǵannan keiin abattandyrý máseleleri boiynsha jumysty bastaý kerek», - dep atap ótti A.Kólginov
