Elordalyq «ANTIKOR» ortalyǵynda qala ákimi Altai Kólginovtiń tóraǵalyǵymen qyzmetkerdiń sybailas jemqorlyǵy úshin birinshi basshylardyń jaýapkershiligin kúsheitý jóninde onlain keńes ótti, dep habarlaidy "Ult aqparat".
«Memleket basshysynyń tapsyrmasymen daǵdarystan keiingi jáne daǵdarysqa qarsy mehanizmder boiynsha birqatar naqty baǵdarlamalardy júzege asyryp kelemiz. Sondai mańyzdy baǵdarlamalardyń biri - Jumyspen qamtýdyń jol kartasy. Qazir karantin ýaqytynda kóptegen adamdardyń ýaqytsha jumyssyz qalýy máselesi týyndady. Birneshe kásiporyn ýaqytsha toqtatyldy. Endi Jol kartasy boiynsha qalany abattandyrý, jol jóndeý, saiabaqtar qurý jumystaryn jandandyrýymyz kerek. Bul jumys ashyq túrde ótýi tiis», - dedi Altai Kólginov.
Onyń aitýynsha, ákimdiktiń birneshe basqarmasy, onyń ishinde jumyspen qamtý, otyn-energetikalyq resýrstar, satyp alý, qurylys basqarmalary QR Sybailas jemqorlyqqa qarsy is-qimyl agenttigimen memorandým ornatyp, óz jumysyn ashyq kórsetýi tiis.
«Barlyq protsedýralardyń ashyq oryndalýyn qamtamasyz etý qajet. Taǵy da birinshi basshylardyń óz qaramaǵyndaǵy qyzmetkerler úshin jaýapty ekenin eske salǵym keledi. Sonymen birge, merdigerlerden de jaýapkershilik alynbaidy. Biýdjettik baǵdarlamalar ákimshileri barlyǵyn qadaǵalaýy tiis. Biz olardyń jumysyn baqylap, kemshin tustaryn qoǵamdyq talqylaýǵa shyǵaramyz. Biz atqaryp jatqan jumys eń aldymen turǵyndarǵa qolaily jaǵdai jasaýǵa baǵyttalýy kerek», - dedi elorda ákimi.
