Nur-Sultan ákimi Altai Kólginov qala turǵyndaryn saqtyq sharalary men sanitariia normalaryn karantinnen keiin de barynsha saqtaýǵa shyqyrdy. Bul týraly ol Instagram-daǵy paraqshasynda jazdy, dep habarlaidy "Ult aqparat".
«Karantin alynǵannan keiin epidemiologiialyq jaǵdaidyń qalai bolaryna taldaý jasadyq. Boljamǵa sáikes, jaǵdai birden jaqsaryp ketpeidi. ORVI maýsymyn eskersek jyldaǵydai meditsinalyq mekemelerge aýrytpalyq túsedi. Qazirdiń ózinde daiyndyq jumystaryn júrgizip jatyrmyz. Emhana, aýrýhanalarǵa qosymsha kómek kórsetildi. 600-den astam flýometr, 500-ge jýyq ottegi kontsentratory, 500-ge jýyq arnaiy tósek-oryn, ókpeni jasandy jeldetý jáne KT apparattary alyndy. Aldaǵy ýaqytta jedel járdem kólikteri de jetkiziledi. Eki apta ishinde qalaǵa 110 tonnadan astam dári jetkizildi. Biz bul jumystardy júieli negizde jalǵastyra beremiz», - dedi A.Kólginov.
Elorda basshysynyń aitýynsha, qajet bolǵan jaǵdaida barlyq 16 infektsiialyq statsionar qaita ashylady.
«Sporttyq ǵimarattar men basqa da birqatar nysan kez kelgen sátte oryndar ázirlei alady. Jasyratyny joq, qala turǵyndary alǵashqy karantinnen keiin sanitariia normalaryn saqtamady. Bul, keri áserin tigizip, indetke shaldyqqandardyń sany kúrt ósti. Dárigerler men meditsinalyq uiymdar múmkindiginshe baryn salyp jumys istedi. Karantin sharalary ǵana jaǵdaidy turaqtandyrýǵa múmkindik berdi», - dedi ol.
Atap ótilgendei, infektsiialyq statsionarlardaǵy tósek-orynǵa suranys shilde aiynyń basynan bastap 99 paiyzdan 18,5 paiyzǵa deiin tómendedi. 16 statsionardyń beseýi jabyldy. Olarda bolǵan barlyq naýqastar jazylyp shyqty. KVI máseleleri boiynsha jedel járdem shaqyrý sany 9,5 esege jýyq tómendep, táýligine 500-den 53-ke deiin azaidy. Statsionarlarda pnevmoniiamen aýyratyn naýqastardyń sany 6 ese qysqardy.
№1 jáne №2 qalalyq balalar aýrýhanasy tamyz aiynyń basynan bastap burynǵy rejimde jumys istei bastady.
«Erteńnen bastap qalalyq emhanalar josparly qabyldaýdy qaita jalǵastyrady. Biraq indetti juqtyrý qaýpi joiyldy deýge áli erte. Infektsiiany toqtatý úshin saqtyq sharalary men sanitariia normalaryn barynsha saqtaý qajet», - dep jazdy Altai Kólginov.
