Májilis tóraǵasy Nurlan Nyǵmatýlin aýyldarda jeke kásibi bar áielderdiń máselesin kótergen burynǵy eńbek jáne halyqty áleýmettik qorǵaý vitse-ministri, qazirgi depýtat Nurjan Áltaevty maqtady, dep habarlaidy Sputnik Qazaqstan tilshisi.
Májilistiń jalpy otyrysynda jýyrda ǵana depýtat bolǵan eks-vitse-ministr Nurjan Áltaev aýyldyq eldi mekenderdegi kásipkerlikti damytý máselesin kóterdi. Premer-ministrdiń atyna joldaǵan depýtattyq saýalynda ol halyqtyń jartysyna jýyǵy turatyn aýyldyq jerlerde tabys óte tómen ekenin atap ótti. Al kásipkerlikti damytý baǵdarlamasynda genderlik aspekt tiisti deńgeide eskerilmegen.
"Biz aýyl áielderi arasynda kásipkerlikti damytý sharalaryn qolǵa alýymyz qajet. Aýylda turatyn áielder mobildi emes, bilimi de jetkiliksiz, tolyqqandy damýǵa, biznespen ainalysýǵa múmkindikteri joq. Aýyl áielderi arasynda tabystyń tómendigi óńirlik jáne ulttyq aýqymda eldiń damýyn tejep otyrǵan mańyzdy problema", - dedi Áltaev.
Onyń aitýynsha, qazirgi tańda elimizde mikrokreditke bólinetin 62 milliard teńgeniń tek 20 protsenti ǵana kásipker áielderge beriledi. Ol sonaý 90-shy jyldardyń basynda erler emes, dál osy áielder qazaqstandyq kásipkerliktiń negizin qalaǵanyn atap ótti.
"Bárimizdiń esimizde shyǵar, 90-shy jyldardyń basynda elimiz endi ǵana táýelsizdik alǵanda, erler divanda jatyp, naryq pen naryqtyq ekonomikanyń ne ekenin túsinýge tyrysyp, bas qatyryp júrgende, dál osy áielder qazaqstandyq kásipkerliktiń negizin qalady", - dedi májilismen.
Jas depýtattyń mańyzdy problemany kótergeni Nurlan Nyǵmatýlinge unap qaldy.
"Úkimetten parlamentke kelgen keide paidaly ekenin kórip otyrsyzdar ǵoi?! Úkimette osy máseleler júkteldi – ainalysqan joq. Mynda keldi – problemany baiqap qaldy. Jaraisyń", - dep maqtady depýtatty Nyǵmatýlin.
"Áielder kómek suraidy", - dep qysqa qaiyrdy Áltaev.
Aita ketsek, Nurjan Áltaev osy jyldyń aqpanynda májilis depýtaty boldy. Buǵan deiin eńbek jáne halyqty áleýmettik qorǵaý ministriniń orynbasary qyzmetin atqarǵan.
