Qyrǵyz Respýblikasynyń eks-prezidenti Almazbek Atambaevtyń Qoi-Tash aýylyndaǵy úiinen túrli qarý-jaraqtar men jarylǵysh zattar tabyldy, dep habarlaidy Kabar.
Agenttiktiń Qyrǵyz IIM silteme jasaǵan habarlamasynda, Atambaevtyń úiinen Dragýnov snaiperdik vintovkasy (SVD), Simonov ózdigimen zariadtalatyn karabin (SKS), pistolet-pýlemiot qurylymyndaǵy pistolet «Kapral» t.b. qarý-jaraq túrleri tárkilengen. Barlyǵy 11 birlik jarylǵysh jáne janatyn qarý tabyldy.
Qazirgi kezde eks-prezidenttiń úiinen tabylǵan qarý-jaraqtarǵa kriminalistikalyq saraptamalar jasalýda.
Eske salaiyq, 8 tamyz kúni keshqurym Qyrǵyzstannyń Ishki ister ministrligi Atambaevtyń ustalǵanyn resmi habarlaǵan bolatyn.
7 tamyz kúni A.Atambaevtyń Qoi-Tash aýylyndaǵy úiinde atys boldy. Arnaiy operatsiia saldarynan Bishkek qalasy men Shý oblystyq birikken aýrýhanalaryna túrli jaraqatpen 45 adam tústi. Shý oblystyq Ishki ister bas basqarmasynyń basshysy Samat Qurmanqulov aýyr halde jatyr. Arnaiy jasaq quramyndaǵy bir adam kóz jumdy.
Málim etilgendei, quqyqqorǵaý organdary tarapynan azamattarǵa qatysty atys qarýy qoldanylǵan joq. Qarý A.Atambaevtyń jaqtastary tarapynan atylǵan.
Atambaevtyń úiinde bolǵan oqiǵalardan keiin Qyrǵyzstannyń Bas prokýratýrasy «Jappai tártipsizdikter», «Buzaqylyq», «Adam óltirý», «Adamdy kepilge alý» baptarymen sotqa deiingi tergeý amaldaryn bastaǵanyn málimdedi. Degenmen, el astanasyndaǵy jaǵdai turaqty ekeni atap ótildi. Aita ketsek, 8 tamyzda Qyrǵyzstanǵa Sholpan atada ótetin EAEO elderiniń Úkimet basshylary kezdesýine (9 tamyz) resmi delegatsiialar kele bastady. «Eldegi oqiǵalarǵa qaramastan, Eýraziia úkimetaralyq keńesi belgilengen ýaqytynda ótedi», - dep málimdedi Qyrǵyz Respýblikasy premer-ministriniń baspasóz hatshysy Ádilet Sultanaliev.
Sondai-aq 8 tamyzda Jogorký Keneshtiń kezekten tys otyrysy ótip, onda el prezidenti Sooronbai Jeenbekov bilik «halyqtyń bólinýine, turaqsyzdyqtyń ornaýyna jol bermeitinin» málim etti.
«Atambaevtyń taraby atys qarýyn qoldanǵanyna qaramastan, arnaiy kúshter atys patrondaryn paidalanǵan joq», - dedi ol.
«Eger keshegi kúnge deiin Atambaevty tergeýge kýáger retinde shaqyrsa, endi oǵan asa aýyr qylmys jasaǵany úshin kúdikti retinde qaraityn bolady», - dedi Jeenbekov.
Budan bólek, parlament otyrysynda depýtat Myktybek Abdyldaev Atambaevtyń úiine shabýyl jasaý kezinde tutqynǵa alynǵan arnaiy jasaq qyzmetkerleri bosatylǵanyn habarlady.
Aita ketsek, buǵan deiin Jogorký Kenesh eldiń eks-prezidentinen qol suqpaýshylyq mártebesin alyp tastaý týraly sheshim qabyldaǵan bolatyn. Atambaevqa qatysty depýtattar tarapynan taǵylǵan aiyptardy zertteý boiynsha arnaiy depýtattyq komissiia quryldy. Komissiia jumysynyń nátijesinde oǵan 6 epizod boiynsha aiyp taǵý sheshimi qabyldandy. Alaida Bas prokýratýra komissiianyń jumysyn zań turǵysynan baǵalai kele, tek bes epizodty qaldyrdy.
