Aldaǵy ýaqytta Qyrǵyzstannyń eks-prezidenti Almazbek Atambaev basqarýshy partiianyń tóraǵalyǵyna sailanýy múmkin. Bul týraly Qazaqstannyń xalyqaralyq qatynastar keńesiniń tóraǵasy Erlan Qarin aitty, dep xabarlaidy QazAqparat tilshisi.
«Qyrǵyzstannyń partiialar maidanynda saiasi belsendilik artýy ábden múmkin. Sebebi Almazbek Atambaev úlken saiasatqa qaita oralmaqshy. Jaqyn arada ol Qyrǵyzstannyń basqarýshy partiiasy - sotsial-demokrattardyń jetekshiligine keledi degen boljam bar. Sóz joq, bunyń bári osy eldiń ishki ómirine óz áserin tigizedi. Qyrǵyz sarapshylaryna sensek, merziminen buryn parlamenttik sailaý da ótýi múmkin», - deidi saiasattanýshy Erlan Qarin.
Al Irandaǵy qazirgi jaǵdaiǵa qatysty suraqqa saiasattanýshy kórshi Qyrǵyzstandy mysal retinde keltirdi. Onyń aitýynsha, belgili bir shielenister kezinde boljamdar kóp bolady. Al naqty saraptama, sonyń ishinde aimaqtyq saraptama jasalmaidy. Biz, kóp jaǵdaida, ishki máselelermen shektelemiz.
«Qazir Iran deimiz, osy joly biz Qyrǵyzstannyń ózin úsh-tórt ai talqyladyq ta, qoidyq. Al erteń ol jaqta taǵy bir tosyn jaǵdai týyndap jatsa, bizdiń sarapshylar Qyrǵyzstandaǵy ishki saiasi kúshterdiń araqatynasyn, kimniń qandai baǵytta, qandai kózqarasy men jospary bar ekenin dóp basyp, aita almaidy», - dep atap kórsetti E.Qarin.
Aita keteiik, búgin Qazaqstannyń xalyqaralyq qatynastar keńesi (QHQK) biylǵy jyldyń mańyzdy oqiǵalaryn jariialady. Sarapshylardyń aitýynsha, aǵymdaǵy jylda Ortalyq Aziianyń ekonomikasy ósedi. Budan bólek, Ortalyq Aziia basshylary 2005 jyldan beri alǵash ret kezdesýi múmkin degen boljam bar.
