Qyrǵyzstandyq saiasatkerler Azimbek Beknazarov, Ahmatbek Keldibekov jáne Keneshbek Dýishobaev eks-prezident Almazbek Atambaev pen "Aprel" telearnasyn sotqa berdi. Azattyqtyń Qyrǵyz redaktsiiasynyń habarlaýynsha, olar sottan 18 million som (257 myń dollar) óndirip berýin suraǵan.
"Aprel" telearnasynyń direktory Dmitrii Lojnikovtyń Facebook-tegi paraqshasynda habarlaýynsha, saiasatkerler Atambaev pen telearnanyń árqaisysynan 9 million somnan talap etken.
Parlamenttiń eks-spikeri Ahmatbek Keldibekov "NUR TV" telearnasyna bergen suhbatynda eks-prezident Almazbek Atambaevty jaqynda jasaǵan málimdemesi úshin sotqa beretinin aitqan edi. "Ol málimdemesinde adamdyń ar-namysyna tigen. Men sotqa shaǵymdanamyn. Ol sózderin sotta dáleldei almasa, jaýapqa tartýyn talap etemin" degen Keldibekov.
10 jeltoqsanda "Aprel" telearnasyna suhbat bergen Almazbek Atambaev Ahmatbek Keldibekovtyń jemqorlyqqa qatysy bar bolýy múmkin ekenin málimdegen.
"Adamdardy soqyr kórgisi keledi. Adal eńbekpen tapqan tabys pen urlaǵan aqshanyń aiyrmasy joǵyn kórsetkisi keledi. Memlekettik qyzmette júrip millioner atanǵan sol Keldibekovter men Tiýleevter "Atambaevty qamaý kerek" dep aityp júr ǵoi. Kimdi qamaý kerek? Memleketten urlap baiyǵandardy ma álde óz eńbegimen aqsha taýyp, ata-babasynyń jerinde ózine úi salǵan adamdy ma? Baiqap otyrmyn, qazirgi bilik urylar men jala jabýshylarmen til taýyp otyr. Olardy tutqyndamaityny árine, tańǵaldyrady" degen Atambaev.
Jeltoqsan aiynda Keldibekov Kyrgyztoday.kg saityn sotqa berip, 1 million som (shamamen 14 myń dollar) talap etken. Saiasatker basylymda jariialanǵan maqala óziniń ar-ujdanyna nuqsan keltirdi dep esepteidi.
