Almaty ákimi Baqytjan Saǵyntaev qalada jaǵdaidy turaqtandyrýǵa jáne tártip ornatýǵa yqpal etkeni úshin qala turǵyndaryna alǵys aitty, dep habarlaidy QazAqparat.

Qala ákimi Prezidenttiń batyl is-qimyly men sheshimi eldiń kúireýiniń aldyn alýǵa septigin tigizgenin aitty. 

«Biz qazaqstandyqtardyń qiyn kezeńde uiymshyl bolyp, jumylǵan judyryqtai áreket ete alatynyna taǵy da kóz jetkizdik. Almatylyqtarǵa tártipsizdik kezinde kórsetken sabyrlylyq pen batyldyq jáne bizge kórsetken kómekterińiz úshin alǵys aitamyn», - dedi qala ákimi. 

Aita keteiik, qazirgi ýaqytta Almatynyń tynys-tirshiligin qalpyna keltirý jónindegi qalalyq shtab táýlik boiy jumys isteýde. Qalanyń barlyq qyzmetteri antiterroristik ortalyqpen tyǵyz qarym-qatynasta. Barlyq máseleler kelisilgen túrde sheshilýde jáne qala birtindep qalypty jaǵdaiǵa oralýda. 

Qalanyń barlyq aýdandarynda tazalyq jumystary júrgizilýde. Kóshelerden 200 tonnadan astam qoqys, aýlalardan myń tonnadan astam QTQ shyǵaryldy. Kommýnaldyq qyzmetter áskeri qyzmetshiler zalalsyzdandyrǵan aýmaqtarǵa kiredi. Quqyq qorǵaý organdary qalany tazartýdy jalǵastyrýda. Bul kúnderi qalanyń tynys-tirshiligin qamtamasyz etý júiesi úzilissiz jumys istedi. Halyqty sýmen jabdyqtaý, káriz, gazben jabdyqtaý, jylý qyzmetterimen qamtamasyz etý shtattyq rejimde júrgiziledi. 

Qalanyń azyq-túlik qaýipsizdigi qamtamasyz etildi. 80-ge jýyq sýpermarket, úsh iri azyq-túlik bazary, 70-ke jýyq JQS, 111 dárihana jumys istei bastady, olardyń úsheýi táýlik boiy jumys isteidi. Avtogaz baǵasy litrine 70 teńgege deiin tómendedi. 

Qala ákimi Baqytjan Saǵyntaev tótenshe jaǵdai rejiminiń talaptaryn múltiksiz saqtaý jáne komendanttyq saǵatty buzbaý qajettigin eske saldy. 

«Qabyldanyp jatqan sharalar qala ómirin birtindep qalypqa keltirýge múmkindik berdi. Bizden tek sabyrlyq, shydamdylyq pen túsinistik qajet», - dedi ol.