Búgin QR Mədeniet jəne sport ministri Aqtoty Raiymqulovanyń tóraǵalyǵymen Almaty taý klasterin damytý jobalyq keńsesinde investorlardyń qatysýymen kezdesý ótti, dep habarlaidy "Ult aqparat".
«Úkimet basshysy Almatyda taý klasteri aýmaǵynda týrizmdi damytýǵa erekshe den qoiyp otyr. Bul əlem týristeriniń qyzyǵýshylyǵyn arttyrýǵa zor múmkindik beredi. Sebebi, óńirde eko, etno, taý shańǵy týrizmi salasynda usynatyn, kórsetetin alýan qyzmet túri jeterlik.
Ótken jyly «Ile-Alataý» ulttyq tabiǵi parkin damytýǵa arnalǵan jol kartasyna qol qoiyldy. Nətijesinde investor tabylyp, Aiýsai shatqalynda sapar ortalyǵynyń qúrylysy júrip jatyr. Dəl osyndai joba «Kólsai kólderi», «Altyn emel» ulttyq tabiǵi parki aýmaǵyna qyzyǵýshylyq tanytqan investorlarmen de talqylandy», - dedi ministr.
Sonymen qatar Aqtoty Raiymqulova tez arada halyqaralyq təjiribege nazar aýdaryp, meńgerýdiń, ekotýrizm boiynsha sapar ortalyǵy, eko-qonaq úi, kemping, glemping qurylysyna qatysty standarttar daiyndaýdyń mańyzdy ekenin atap ótti. Taǵy memlekettik ulttyq tabiǵi parkterge kelip-ketýshiler esebin júrgizetin ədisteme daiyndaý keregin aityp, bioalýandyqty saqtaý, tabiǵatqa, ekologiiaǵa ziian kertirmeý qajettigine toqtaldy.
QR Mádeniet jáne sport ministrliginiń málimetinshe, basqosý barysynda jobalyq keńseniń osy ýaqytqa deiingi jumysy qorytyndylandy. Bir jyl ishinde keńse Almaty taý klasterin damytý boiynsha birqatar jobany júzege asyryp, kelissóz jumysyn júrgizip, monitoringpen ainalysty. Onyń ishinde ulttyq parkterde ekotýrizmdi damytý, «Oi-Qaraǵai Lesnaia skazka» men «Aq-bulaq» jobasy bar.
Keńse Shveitsariianyń standartyn eskere otyryp, taý shatqaly joldaryn júieleý boiynsha ədisteme zerttelip, tiis usynystar daiyndalyp jatyr. Qazir gid-jol nusqaýshy jəne tsifrlandyrýǵa basymdyq berilip otyr. Aldaǵy ýaqytta «Gid-jol nusqaýshy mərtebesi», «Reindjer», «Taý týrizmi boiynsha nusqaýshy», «Alpinizm boiynsha nusqaýshy» atty jańa uǵymdar engizý, gid-nusqaýshylar reestrin qurý josparda bar.
Tsifrlandyrý aiasynda nysandarda beine baqylaý júiesin, taýly jerde shuǵyl shaqyrý túimesin engizý qarastyrylǵan. Atalǵan jumys Qazaqtelekom, əkimdik jəne Sergek komandamen birge iske asady. Sonymen qosa Kazakh Alpin Club-pen birlesip qutqarý pýnktterin salý josparlanǵan.
Aita keterligi, ótken jyldyń sońynda QR Premer-Ministri Asqar Maminniń tapsyrmasymen Kazakh Tourism kompaniiasy, Almaty qalasy men oblys əkimdiginiń janynan Almatyda taý klasterin damytý boiynsha birikken jobalyq keńse qurylǵan edi. Biyl qarashadan bastap bul bastamany mekemearalyq kelisimge qosylǵan Ekologiia, geologiia tabiǵi resýrstar ministrligi qoldap, ər tabiǵi parkten ókil taǵaiyndady.
