Almaty qalasy Almaly aýdany ákiminiń mindetin atqarýshy Arhat Omarov óńirlik kommýnikatsiialar qyzmetindegi brifingide megapolis ákimi Baqytjan Saǵyntaevtyń qalanyń tarihi ǵimarattarynyń kelbetin saqtaý jónindegi tapsyrmasynyń oryndalý barysy jaily aitty, dep habarlaidy QazAqparat.
Biyl kóppáterli úilerdiń 69 qasbetine jóndeý jumystary júrgizildi. Kelesi jyly Almaly aýdanynda 50 úidiń qasbetin jóndeý josparlanyp otyr.
Sonymen qatar, mádeni ortany damytý maqsatynda Jazýshylar Odaǵynyń ǵimaratyn jóndeý, № 4 kitaphana men Chehov atyndaǵy qalalyq kitaphanany jańǵyrtý jumystary aiaqtaldy.
«Abylai han dańǵylynda ornalasqan Jazýshylar Odaǵynyń tarihi ǵimaraty boiynsha jumystar 2019 jyly bastaldy. Búgingi tańda barlyq jumystar 100% aiaqtaldy. Kúrdeli jóndeý jumystary aiasynda shatyr, jeli jáne ishki árleý tolyǵymen jóndeldi», - dedi Arhat Omarov.
Qazaqstannyń eńbek sińirgen qairatkeri, QR Jazýshylar odaǵynyń tóraǵasy Ulyqbek Esdáýlet Almaty qalasynyń ákimdigine infraqurylymdy jańǵyrtý máselesin sheshkeni úshin alǵys bildirgen edi. Onyń aitýynsha, jóndeý jumystary Jazýshylar úiiniń negizgi ǵimaratynda da, májilis zalynda da júrgizilgen.
