Búgin saǵat 10.00-den bastap Almatydaǵy saýda,oiyn-saýyq ortalyqtary men bazarlarda koronavirýsqa qarsy vaktsina salý pýnkteri jumys istei bastady, dep habarlaidy "Ult aqparat".
Búgin «Máskeý» saýda, oiyn-saýyq ortalyǵy jumys istemese de, egý pýnkti qyzmetin bastady. Kúzet qyzmetindegiler ǵimaratqa tek vaktsinatsiiaǵa aldyn ala jazylǵandar men shaqyrylǵandardy kirgizedi. Ol úshin qaýipsizdik qyzmetiniń qyzmetkerine eskertý jetkilikti.
«Máskeý» SOSO egý pýnktiniń jaýapty kezekshisi Gúldana Tóleshova atap ótkendei, meditsina qyzmetkerleri saǵat 10.00-den bastap, saǵat 20.00-ge deiin almatylyqtarǵa ekpe júrgizýdi jalǵastyrady. Dárigerler Almaty qalasynyń № 16 emhanasyna tirkelgen azamattarǵa aldyn ala qońyraý shaldy. Sondai-aq E-gov arqyly vaktsinatsiia alýǵa jazylǵandar da bar. Tórt saǵat ishinde dárigerler 50-ge jýyq adamǵa ekpe saldy, vaktsinatsiia qyzý júrip jatyr.
Koronavirýstan ekpe alǵan eń jas adam 18-de bolsa, jasy eń úlkeni – 87-degi qart.
«Egý pýnktinde 2 terapevt dáriger men medbikeler jumys isteidi. Adam sany kóp emes, betperde rejimi, áleýmettik qashyqtyq saqtalǵan, kezegin kútýshiler bir-birinen alshaq otyrǵyzylady. Barlyǵy aldyn ala tirkeýden, sodan keiin dárigerdiń qaraýynan ótedi, sodan keiin qarsy kórsetilimder bolmasa, patsientti emshara kabinetine jiberemiz», - dep túsindirdi Gúldana Tóleshova.
Aita keteiik, almatylyqtar vaktsinatsiiaǵa sanaly túrde, óz erkimen jazylyp, emhanalarda, SOSO bazasynda ornalasqan pýnkterge kelýde.
