«Almaty» telearnasyndaǵy Akimat Live baǵdarlamasynyń tikelei efirinde qala ákimi Baqytjan Saǵyntaev «Jańa Almaty» keshendi josparynyń júzege asyrylýy jáne keler jyly atqarylatyn aýqymdy jumystar týraly aitty, dep habarlaidy "Ult aqparat".
Qala ákimi B. Saǵyntaev «Jańa Almaty» keshendi jospary 2019 jyly megapolis turǵyndarymen ótken kezdesýlerdiń nátijesi ekenin eske saldy. Onyń basty mindeti – qalanyń ortalyǵy men shetindegi aiyrmashylyqty joiý. «Jańa Almaty» keshendi damý josparynda injenerlik jáne jol-kólik infraqurylymyn jaqsartý, jaryqtandyrý, áleýmettik nysandardy salý jumystary qarastyrylǵan jáne 2020-2024 jyldarǵa eseptelgen.
Jalpy, osy Jospar aiasynda 350 shaqyrym jol, 4 jol airyǵy, 6 joldy sozý, 28 baǵdarsham nysany, 55 jaiaý júrginshi ótpeli joly jáne 8 jer asty ótpeli joldary salynady. 194 gektar aýmaqty kógaldandyrý da josparlanǵan.
Máselen, ótip bara jatqan 2020 jyly Keshendi jospar aiasynda 300 shaqyrym sýmen jabdyqtaý jáne káriz jelileri salyndy. Nátijesinde 50 myń qala turǵyny sýmen jabdyqtaýdyń jáne sýdan burýdyń ortalyqtandyrylǵan júiesine qosyldy. Sonymen qatar, qala shetindegi 965 kóshe jaryqtandyryldy, 42,8 shaqyrym jol salyndy. Qazirgi kezde 4 saiabaq jáne 5 jaiaý júrginshiler aimaǵy abattandyrylýda.
2021 jyly barlyǵy 35 áleýmettik nysandy paidalanýǵa berý josparlanǵan. Sonymen qatar, 8 mektep pen 21,4 myń oryndy 17 qosalqy nysandardyń qurylystaryn aiaqtaý josparlanýda.
Densaýlyq saqtaý mekemelerine erekshe nazar aýdarylatyn bolady. 2021 jyly №7 qalalyq klinikalyq aýrýhananyń jańa korpýsy (qosalqy nysan),qýattylyǵy jylyna 80 myń naýqasty qabyldaityn aýdanaralyq týberkýlez dispanseri iske qosylady jáne №6 emhanany kúrdeli jóndeý jáne seismikalyq kúsheitý jumystary aiaqtalady.
Budan ózge, balalardyń meditsinalyq jedel járdem Ortalyǵynyń qabyldaý bóliminiń jańa korpýsyn jáne operatsiialyq blogyn salý josparlanýda. Jetisý aýdanynyń «Kemel» yqshamaýdanynda 200 adam qatynaityn jáne Túrksib aýdanynyń «Nurshashqan» yqshamaýdanynda 100 adam qabyldaityn otbasylyq-dárigerlik ambýlatoriialar salý da qarastyrylǵan.
Sonymen qatar, keler jyldyń II toqsanynda Alataý aýdanynyń Trýdovik yqshamaýdanynda jedel áleýmettik kómek pýnktiniń qurylysy bastalady.
Keler jyly Jetisý aýdanyndaǵy «Ainabulaq-2», Medeý aýdanyndaǵy «Alataý», Túrksib aýdanyndaǵy «Jas-Qanat», Alataý aýdanyndaǵy «Zerdeli», Jetisý aýdanyndaǵy «Kemel» jáne «Qulager» yqshamaýdandarynda 6 deneshynyqtyrý-saýyqtyrý keshenderin salý josparlanýda.
Kólik infraqurylymy salasynda Alataý, Naýryzbai jáne Túrksib aýdandarynyń 7 yqshamaýdandaryndaǵy 317 kóshede jalpy uzyndyǵy 76 shaqyrymnan asatyn jańa joldardyń qurylysy jalǵasady. Bul 60 myń qalalyqtyń kólikke qoljetimdiligin jaqsartady.
Budan ózge,jalpy uzyndyǵy 200 shaqyrym bolatyn joldar jelisiniń jol jamylǵysyn jóndeý josparlanýda. Jalpy qala boiynsha barlyǵy 30 shaqyrymnan astam trotýarlar jóndeledi jáne abattandyrylady, jalpy alańy 280 myń sharshy metrden asatyn jol jamylǵysyna aǵymdaǵy jóndeý jumystary júrgiziledi.
Keler jyldyń sońyna deiin Medeý aýdanynyń Dýman yqshamaýdanyndaǵy uzyndyǵy 30,4 shaqyrym bolatyn 59 kóshedegi joldardyń kúrdeli jóndeý jumystary aiaqtalady. Ótip bara jatqan jyly uzyndyǵy 3,7 shaqyrym bolatyn 6 kóshe jóndeldi.
Injenerlik infraqurylymdy jaqsartý aiasynda qalanyń 7 aýdanynda sýmen jabdyqtaý jáne sýdy burý jelileriniń qurylystary jalǵasady. Keler jyly jalpy uzyndyǵy 434 shaqyrymnan asatyn sýmen jabdyqtaý jáne sýdan burýdyń 21 jobalaryn aiaqtaý josparlanýda. Sondai-aq, 2021 jyly 7 káriz-sorǵy stantsiialarynyń qurylysyn aiaqtaý qarastyrylǵan.
Keshendi jospardy júzege asyrý jumysy jalǵasyp jatyr.
