Almaty qalasynyń ákimi Baqytjan Saǵyntaevtyń tóraǵalyǵymen ótken apparat keńesinde 2020 jyly paidalanýǵa beriletin investitsiialyq jobalardy iske asyrý qarqyny qaraldy, dep habarlaidy "Ult aqparat".
Biylǵy 9 aida megapolistiń negizgi kapitalyna salynǵan investitsiia kólemi 608,2 mlrd teńgeni qurady, fizikalyq kólem indeksi - 112,6%. Ótken jyldyń osy kezeńinde tartylǵan investitsiia kólemi 534,6 mlrd teńge bolatyn.
Jyl basynan beri 179 mlrd teńgeniń 34 jobasy iske asty. Onyń ishinde 130,7 mlrd teńgege 19 jastar turǵyn úi jáne óńdeý ónerkásibinde 32,6 mlrd teńgeniń 7 jobasy bar. Sonymen qatar, avtokólikter shyǵaratyn «Hyundai Trans Kazakhstan» zaýyty, qaǵaz ónimderin óndiretin «Papirone», mai ónimderin shyǵaratyn «Maslodel», avtomatty qaqpalar jasaityn «DoorHan», «Brotmaster», «Samruk Group», «Ala Estate» óndiristik parkteri quryldy.
Áleýmettik mańyzy bar 3 nysan paidalanýǵa berildi. Atap aitsaq, TAMOS & Prestige mektebi, Sh.Ýálihanov atyndaǵy halyqaralyq mektep, SEN kópsalaly mýzyka ortalyǵy. Sondai-aq, saýda jáne halyqqa qyzmet kórsetý salasynda 5 nysan salyndy.
Jyl sońyna deiin jalpy quny 454,3 mlrd teńgeni quraityn 82 investitsiialyq jobany iske asyrý josparda tur. Sonymen qatar, jeltoqsannyń sońyna deiin saýda jáne qyzmet kórsetý salasynda 82 joba júzege asady. Birqatar áleýmettik mańyzy bar nysandar paidalanýǵa beriledi.
Jalpy, 2020 jyldyń qorytyndysy boiynsha megapolistiń negizgi kapitalyna salynǵan investitsiialar kólemi 900 mlrd teńge deńgeiinde, fizikalyq kóleminiń indeksi – 107% dep boljanýda.
Almaty ákimi Baqytjan Saǵyntaev josparlanǵan indikatorlardy oryndaý úshin investitsiialyq jobalardyń iske asyrý barysyn turaqty baqylaýda ustaýdy tapsyrdy.
