Almaty ákimi Baqytjan Saǵyntaev kásipkerler jalǵa alyp otyrǵan ǵimarattardyń aqysyn tóleýde qandai jeńildikter qarastyrylǵanyn aitty, dep habarlaidy QazAqparat.
«Elde tótenshe jaǵdai rejimi engizilgen ýaqytta qyzmet kórsetý salasy - qoǵamdyq tamaqtaný, fitnes jáne sport, saýda oryndary aitarlyqtai shyǵynǵa ushyrady. Biznes úshin ǵimarat jaldaǵan 9 myńǵa jýyq (24,7%) kásipker qiyndyqqa tap bolady. Qazir jalǵa berýshilermen jeńildik sharttaryn usyný máselesi talqylanyp jatyr»,– dedi shahar basshysy.
Ákimniń aitýynsha, karantin kezinde ǵimarat ieleriniń basym bóligi kásipkerlerge qoldaý kórsetip, jaldaý aqysyn alǵan joq.
«Tótenshe jaǵdai men karantin kezinde iri saýda nysandarynyń ieleri, onyń ishinde 153 oiyn-saýyq ortalyǵy, saýda ortalyqtary, saýda úileri men bazarlar 40 myńǵa jýyq jalǵa alýshydan jaldaý aqysyn alýdy toqtatty. Sonymen qatar, qazirgi ýaqytta kóptegen bazarlar men saýda jáne oiyn-saýyq ortalyqtary jalǵa berý qunyn 20-30% tómendetken», - dedi Baqytjan Saǵyntaev.
Almaty qalalyq «Atameken» kásipkerler palatasynyń kómegimen 2,7 mlrd teńgege 13 myńǵa jýyq saýda obektisin jalǵa alýshylardyń problemasy sheshildi. Bul baǵyttaǵy jumystar jalǵasyp jatyr.
Mysaly, «Moskva metropolitan» saýda ortalyǵynyń saýda alańdarynda 180 jalǵa alýshy bar, olardan ai saiyn 265 mln teńge tólem túsedi. Qomaqty shyǵynǵa ushyraǵanyna qaramastan, jalǵa berýshi daǵdarysqa qarsy jeke sharalardy qabyldai otyryp, jalǵa alýshylardy tólemderden bosatty.
«Avtositi» saýda úiinde 120 jalǵa alýshy bar, olardan ai saiyn 6 mln teńge túsedi. Saýda úii de jalǵa alýshylarǵa qoldaý kórsetýge jáne tótenshe jaǵdai men karantin kezinde olarǵa demalys berýge daiyn.
Qala ákimi nesie tólemin shegerýge qatysty aita kelip, ekinshi deńgeili bank basshylarynyń tólemderdi shegerý máselesi talqylanatyn Iskerlik keńesiniń quramyna engenin habarlady. Búgingi kúni 127,3 mlrd teńgeniń 360 myń nesiesi boiynsha tólem shegerildi.
Sonymen qatar, biznesti qoldaý men damytý jónindegi memlekettik jáne óńirlik baǵdarlamalar aiasynda syiaqy mólsheri tómendetildi. Mysaly, «Biznestiń jol kartasy-2020» baǵdarlamasy boiynsha kásipkerler úshin mólsherleme 6%-ǵa deiin (burynǵysy 8,4%), «Almaty Business-2025» baǵdarlamasy aiasynda 7%-dan 6%-ǵa deiin azaidy.
«Damý» qorymen birge shaǵyn jáne orta biznes endi qarqyn ala bastaǵan Alataý, Naýryzbai, Jetisý, Túrksib jáne Áýezov aýdandarynda syiaqynyń jyldyq mólsherlemesin 7%-dan 5%-ǵa deiin tómendetý boiynsha jumystar júrip jatyr.
