Almatynyń barlyq aýdandary úsh jyldyq damý josparyn jasaýy kerek, bul týraly qala ákimi Baqytjan Saǵyntaev Kazakhstan Urban Conference - 2019 forýmynda aitty, dep habarlaidy QazAqparat.
Jiyn barysynda qala basshysy Baqytjan Saǵyntaev «Almaty-2025» damý baǵdarlamasynyń aldaǵy 5 jylǵa arnalǵan naqty qujaty 2020 jyldyń 1 sáýirine deiin daiyn bolýy kerektigin atap ótti.
«Qalany damytýdyń bas josparynyń tujyrymdamasyn ázirlep, qabyldaý qajet. Sebebi, bul - megapolisti damytýdyń mańyzdy qujattary, olardy 2020 jyldyń 1 qazanynan keshiktirmei kópshilik talqysyna usynýymyz kerek», - dedi Baqytjan Saǵyntaev.
Sonymen qatar, qalanyń barlyq 8 aýdany 2020 jyldyń 1 naýryzynan keshiktirmei úsh jyldyq damý josparyn jasaýy tiis.
«Ár aýdan kásibi ýrbanistermen jáne jergilikti turǵyndarmen kelise otyryp, aýdannyń damý josparyn qurýy tiis. Sondai-aq, ol poliortalyqtandyrý qaǵidattaryna sáikes bolýy kerek. Aýdandardyń biregeiligi de nazardan tys qalmaýy tiis. Eń aldymen onyń áleýmettik infraqurylymynyń damýyn qadaǵalaý qajet. Bolashaqta aýdannyń bas jospary júieli túrde qarjylandyrylady», - dedi ákim.
Aita keteiik, Almatyda «Kazakhstan Urban Conference -2019» forýmy ótip jatyr.
