Almatyda azamattar úshin memlekettik organdardy ashyq jáne qoljetimdi etý maqsatynda «Servistik ákimdik» jobasy júzege asty. Bul týraly qala ákiminiń baspasóz hatshysy Áset Muqajanov málim etti, dep habarlaidy "Ult aqparat".
Áset Muqajanov Instagram paraqshasynda barlyq aýdandarda «Servistik ákimdikter» ashylǵanyn jazdy.
«Open space formatynda azamattarǵa eń qajetti memlekettik qyzmetter kórsetilip, keńes beriledi. Ashyq kabinette azamattardy aýdan ákimderi men onyń orynbasarlary qabyldaidy. Karantinge bailanysty kezdesýler onlain formatta ótedi. Qala turǵyndaryn abattandyrý, TKSh, joldar men aýlalardy jóndeý, qoǵamdyq qaýipsizdik, jaryqtandyrý men sýmen jabdyqtaý máseleleri tolǵandyrady», - dep jazdy Almaty ákiminiń baspasóz hatshysy.
Almaty qalasynyń sybailas jemqorlyqqa qarsy is-qimyl departamentimen birlesip júzege asyrylǵan jobanyń basty maqsaty – memlekettik organdardyń azamattarǵa ashyqtyǵy men qoljetimdiligin arttyrý, kedergisiz ortany qalyptastyrý.
«Memlekettik qyzmetterdi alý protsesi turǵyndar úshin barynsha jeńildetilgen ári yńǵaily. Bul el Prezidentiniń «Halyq únine qulaq asatyn memleket» qaǵidatyna sáikes keledi», - dep atap ótti Á. Muqajanov.
