VII sailanym Almaty qalasy máslihatynyń depýtattary 2022 jylǵa arnalǵan qala biýdjetin qoldap, kezekti XIII sessiiada bekitti. Jalpy somasy – 1,4 trln teńge, dep habarlaidy QazAqparat.
Kelesi jylǵa arnalǵan biýdjet jobasyn depýtattarǵa Almaty qalasynyń ákimi Baqytjan Saǵyntaev tanystyrdy. Ótken jyldardaǵydai, megapolistiń basty qarjylyq qujaty áleýmettik baǵdarlanǵan bolyp qalyp otyr.
Osylaisha, bilim berý salasyna 197,3 mlrd teńge bólindi. Qarajat jalpy sany 310 myń oqýshysy bar 204 mektepti, 15 internat mekemelerin, 48 kolledjdi ustaýǵa arnalǵan. Budan basqa, kelesi jyldan bastap bilim berý obektileriniń buryn jekeshelendirilgen ǵimarattaryn kommýnaldyq menshikke qaitarý josparlanýda. Osynyń arqasynda tek Áýezov jáne Bostandyq aýdandarynda oqýshy oryndyrynyń tapshylyǵyn qysqartý qarastyrylyp otyr.
Sondai-aq, «Ainabulaq», «Saialy-2», «Aqjar» yqsham aýdandarynda 640 oryndyq úsh balabaqshanyń qurylysyn bastaý, Alataý jáne Naýryzbai aýdandarynda bes mektep pen balabaqshany seismikalyq nyǵaitý, innovatsiialyq shyǵarmashylyqtyń eki ortalyǵyn salý josparlanýda.
Densaýlyq saqtaý salasynda 38,7 mlrd teńge kóleminde shyǵyndar josparlanyp otyr. Keńeitilgen meditsinalyq kómek kórsetý úshin «Mamyr-5», 6 yqsham aýdandarynda 200 kelýshige arnalǵan otbasylyq-dárigerlik ambýlatoriia salý josparlanýda.
Az qamtylǵan jáne kóp balaly otbasylarǵa kómek kórsetý úshin ataýly áleýmettik kómekti tóleý jáne azyq-túlik sebetteri men birinshi kezekte qajetti taýarlar berý josparlanǵan, oǵan 947,5 mln teńge bólinedi. Bekitilgen áleýmettik kómek tizbesine sáikes 4 myń zeinetkerdi sanatorlyq-kýrorttyq emdeý boiynsha jeńildikterge 2,1 mlrd teńge, 9 mamyrǵa UOS qatysýshylaryna, az qamtylǵan azamattarǵa bir rettik materialdyq kómek qarastyrylǵan. Múmkindigi shekteýli tulǵalarǵa 2 720 jeke kómekshiler men qimylmen kórsetý tili mamandarynyń qyzmetine 3,3 mlrd. teńge qarastyrylǵan.
Halyqty jumyspen qamtý baǵdarlamasyn qarjylandyrý aiasynda jastar praktikasyna, qoǵamdyq jumysqa jáne erekshe qajettilikteri bar 500 adamnyń eńbek aqysyn sýbsidiialaýǵa qarajat qarastyrý josparlanǵan. Jalpy atalmysh baǵdarlama aiasynda 8 myńnan astam adam qamtylatyn bolady.
Sonymen qatar, kólik salasynda barlyq baǵyttardaǵy avtobýs jolaýshylar tasymaldaryn, sondai-aq temirjol qala mańy qatynastary men metropolitendegi tasymaldardy sýbsidiialaý jalǵastyrylady.
Turǵyn úi salasynda «Nurly jer» memlekettik baǵdarlamasy boiynsha ómirlik qiyn jaǵdaida júrgen adamdar men otbasylarǵa áleýmettik kómek retinde 1 myń turǵyn úi sertifikaty qarastyrylǵan. Sonymen qatar, «Almaty jastary» baǵdarlamasy aiasynda jastarǵa «Otbasy bank» arqyly jeńildetilgen nesie berý josparlanǵan.
Kommýnaldyq infraqurylymdy damytýǵa 64,5 mlrd teńge, onyń ishinde 50 myńǵa jýyq Qurylysshy, Ójet, Saialy, Kemel, Jas Qanat, Qarǵaly, Shańyraq-2 jáne basqa shaǵyn aýdandardyń turǵyndaryn sýmen qamtamasyz etýge baǵyttaý josparlanýda. Medeý, Alataý, Naýryzbai aýdandarynda iesiz jelilerdi qaita jańartý jumystaryn jalǵastyrý josparlanýda.
Jol-kólik infraqurylymyn damytýǵa 42,3 mlrd teńge bólindi. Onyń ishinde 200 shaqyrym jol jabynyn jóndeý josparlanǵan. Buqtyrma kóshesi – Qulja traktisi, Seifýllin dańǵyly – Jansúgirov kóshesi, Sain kóshesi – Móńke Bi kóshesi qiylysyndaǵy kólik jolaiyryqtarynyń qurylysy jalǵastyrylady.
Sondai-aq, sportty, týristik infraqurylymdy damytýǵa, aýmaqtardy kógaldandyrýǵa qarajat qarastyrylǵan.
2022 jylǵa arnalǵan biýdjet jobasy qalanyń boljamdy damý parametrleri men áleýmettik-ekonomikalyq damý boljamyn negizge ala otyryp qalyptastyryldy.
2021 jyldyń qorytyndysy boiynsha biýdjetke túsetin túsimderdi kútiletin baǵalaýǵa sáikes ósim 2020 jylǵa arnalǵan naqty túsimderdiń 115% deńgeiinde boljanyp otyr.
