"Almatymetroqurylys" kompaniiasy direktorlar keńesiniń tóraǵasy Qairat Reimov eki aiǵa qamaldy, dep habarlady Almaty qalalyq sotynyń baspasóz qyzmetine silteme jasaǵan QazTAG agenttigi. Aqparat quralynyń jazýynsha, qarasha aiynyń sońynda ustalǵan Reimovti sot 25 million teńge tólep, kepilmen bosatýǵa kelisken. Biraq 4 jeltoqsanda bul sot sheshiminiń kúshi joiylǵan.
"Almaty qalalyq sotynyń qylmystyq ister alqasy 25 million teńge kepildik retinde tóleý týraly tergeý soty shyǵarǵan qaýlynyń kúshin joidy. Osylaisha ol [Qairat Reimov] eki aiǵa qamaýǵa alyndy jáne tergeý amaldary júrgen kezde qamaýda bolady" dedi Almaty qalalyq sotynyń baspasóz hatshysy mindetin atqarýshy Abai Jarylqasyn 4 jeltoqsanda.
Qarasha aiynyń sońynda Qairat Reimovtiń ustalǵany habarlanǵan edi. 27 qarashada keshke "Almatymetroqurylys" kompaniiasynyń júzge jýyq jumysshysy "Saryarqa" metro stantsiiasynda jinalyp, Reimovtiń ustalýyna qarsylyq tanytqan. Olar Reimovtiń kúrdeli máselelerdi sheshýde mańyzdy ról atqarǵanyn aityp, onyń ustalýy metronyń eki stantsiiasy qurylysynyń toqtap qalýyna áser etýi múmkin ekenin málimdegen.
QazTAG-tyń jazýynsha, 29 qarashaǵa qaraǵan túni sot Reimovti 25 million teńge kepildik qoiyp, bosatýǵa kelisken. Almaty qalalyq politsiia departamenti 1 jeltoqsanda qorǵaý tarabynyń aqshalai kepil qoiyp, Reimovtiń bostandyqqa shyqqanyn habarlaǵan. 3 jeltoqsanda baspasóz jiynyn ótkizgen Reimov óziniń ústinen qozǵalǵan qylmystyq isti "tapsyrys" dep atap, Prezident Qasym-Jomart Toqaevtan máselege aralasýyn suraǵan.
Kóktem ailarynda Reimovtiń ústinen "aqsha jymqyrý", "alaiaqtyq" faktileri boiynsha eki qylmystyq is qozǵalǵan.
