Avtoturaq aqysyn tóleýden jaltarǵan almatylyqtarǵa 920 million teńgeden astam somaǵa 143 myń uiǵarym (aiyppul) shyǵaryldy. Bul týraly A-Parking kompaniiasynyń ókilderi aitty, dep habarlaidy QazAqparat.
Kompaniianyń habarlaýynsha, 2019 jyly «Dozor-M» fotofiksatsiia apparat-baǵdarlama keshenimen jabdyqtalǵan, kólik nómirlerin tanityn jáne kólik turaǵyn tóleý nemese tólemeý týraly aqparatty tirkeitin 11 avtomobil iske qosylǵan.
Kompaniianyń IT direktory Rashid Maqsutovtyń aitýynsha, júie avtomattandyrylǵan. Aqyly turaqqa qoiylǵan kólikterdi tirkep otyratyn arnaiy mashina qala boiynsha júrip, barlyq kólikterdi jappai belgileidi.
«Eger kólik turaq aimaǵynda bolsa, onda arnaiy kameralar avtoturaqqa qoiylǵan barlyq kólikterdi túsiredi. Ol memlekettik nómirdi tirkeý arqyly, GPS-ke sýretke túsirilgen kósheni, ýaqyty men kúnin bailanystyryp jiberedi. Sonymen, avtomobil kúni boiy júredi. Ári qarai, avtomattandyrylǵan júie ýaqytty esepteidi. Osylaisha, biz kóliktiń ol jerde qansha ýaqyt turǵanyn anyqtaimyz. Budan ári, júie tólem faktisin tekseredi, eger tólem jasaǵany rastalsa, oǵan eshqandai shaǵym bolmaidy. Eger tólemegen bolsa, júie uiǵarym shyǵarý týraly usynys jasaidy, biz qujatty kelesi kúni politsiiaǵa jiberemiz», - dep túsindirdi ol.
Kompaniia direktory Marat Pirinbekovtiń aitýynsha, aqyly avtoturaqtar júiesi jumys istegen ýaqyttan bastap memlekettik biýdjetke 1,7 mlrd teńge túsirgen. Onyń 561 mln – salyq aýdarymdary, 267 mln – kólik turaǵy úshin tólemder, 247 mln – memleketke mindetti tólemder, 622 mln teńge qala biýdjetine JQE buzǵany úshin aiyppul túrinde tústi. Bul qarajat Almaty qalasynyń kólik jáne jol jelisiniń jaǵdaiyn jaqsartýǵa baǵyttalǵan.
