Almatyda kópbalaly jáne az qamtylǵan otbasylarǵa 2000 turǵyn úi sertifikaty beriledi. Bul týraly halyqqa esep berý jiynynda Baqytjan Saǵyntaev málim etti, dep habarlaidy QazAqparat.
Qala basshysy ipoteka boiynsha bastapqy jarnanyń bir bóligin jabý úshin jáne bastapqy turǵyn úidi satyp alý kezinde «turǵyn úi sertifikattaryna» jergilikti biýdjetten qarjylandyrý máselesi qaralyp jatqanyn atap ótti.
«Bul másele bizdiń baqylaýymyzda. Biz qazirdiń ózinde qansha úi beriletinin bilemiz, árbir almatylyq óz kezegin elektrondy túrde baqylap, kimge úi beriletinin kóre alady. Eshqandai qupiia joq. Kezekti jedeldetý jónindegi jumysymyz ony biylǵy jyldyń biýdjetine engizdi, biz kópbalaly analarǵa turǵyn úi sertifikatyn beretin bolamyz. Eger olar turǵyn úidi «otbasylyq bank» arqyly satyp alatyn bolsa, onda bastapqy jarnaǵa 2 mlr teńge bóldik. 2000 otbasy kómek ala alady», - dedi Baqytjan Saǵyntaev.
Bul tólem kelesi sanattar úshin qarastyrylǵan:
- kópbalaly otbasylar, múgedek balalary bar nemese múgedek balalardy tárbielep otyrǵan otbasylar;
- jetim balalar, 1-2 sanattaǵy múgedekter.
Aita keteiik, sońǵy 3 jylda 10 myńnan astam almatylyq otbasy páter aldy. Onyń 1,3 myńnan astamy qalalyq turǵyn úi qorynan bólingen jáne 8 myńnan astamy jeńildetilgen ipoteka boiynsha bólingen.
Turǵyn úi alǵandardyń 40%-ǵa jýyǵy áleýmettik jaǵynan osal toptar: 2,3 myńnan astamy – kóp balaly jáne tolyq emes otbasylar, 600-ge jýyǵy-múmkindigi shekteýli adamdar, 300-den astamy-jetim balalar.
Sonymen qatar, «Baqytty otbasy» baǵdarlamasy aiasynda turǵyn úige jyldyq 2%-ben jeńildikpen nesie berý qarastyrylǵan. Bul rette turǵyn úi qurylys Otbasy bankindegi tólem qabilettiligin baǵalaý jeńildetilgen tártippen júrgizilýde. Baǵdarlamaǵa qatysýshy qaryz boiynsha ai saiynǵy tólemdi tóleý úshin kiristerdi jáne bir eresek adamǵa 5 AEK mólsherinde turý úshin eń tómengi somany rastaýy qajet. Tólem qabilettiligin baǵalaý kezinde balalarǵa arnalǵan shyǵystar eskerilmeidi.
