2020 jyldyń 30 sáýirine deiin Meditsinalyq saqtandyrý qoryna 319 mlrd teńgege jýyq qarjy jinaqtaldy. Bul týraly «Áleýmettik meditsinalyq saqtandyrý qory» KEAQ Almaty qalalyq filialy málim etti, dep habarlaidy "Ult aqparat".
«Almaty qalasy respýblika boiynsha jarnalar men aýdarymdardyń kólemi jaǵynan kósh bastap tur – jinaqtalǵan somanyń besten bir bóligi burynǵysha, ońtústik astananyń enshisinde. Jalpy, saqtandyrý júiesi iske qosylǵan 2017 jyldyń 1 shildesinen 2020 jyldyń 30 sáýirine deiingi aralyqta Almaty qalasynan Qorǵa 63 mlrd teńgeden astam jarna aýdaryldy. Onyń 56,7 mlrd teńgesi – jumys berýshilerdiń qaramaǵyndaǵy jumyskerler úshin jasaǵan aýdarymdary, qalǵan 6,6 mlrd teńge – jeke kásipkerler men azamattyq-quqyqtyq kelisimshart boiyntssha eńbek etetinderge tiesili», - dedi filial direktorynyń orynbasary Janar Kenjebaeva.
Sondai-aq, jyl basynan beri ózin-ózi jumyspen qamtyǵan 165 myńǵa jýyq adam 210 mln teńge kóleminde biryńǵai jiyntyq tólem (BJT) tólegen.
Esterińizge sala ketsek, biryńǵai jiyntyq tólem 2019 jyldyń 1 qańtarynan bastap engizilgen bolatyn. Jiyntyq tólemniń ishinde ózge áleýmettik tólemderge qosa saqtandyrý jarnasy da bar. Ol jalpy somanyń 40 paiyzyn quraidy.
BJT – respýblikalyq mańyzy bar qalalar úshin 1 ailyq eseptik kórsetkish (AEK) nemese 2651 teńge, aýyldyq jerler úshin – 0,5 AEK nemese 1326 teńge kóleminde belgilengen. Tólemniń bul túrin frilanserler, santehnikter, qurylysshylar, taksi júrgizýshileri t.b. tólei alady.
