Almatylyqtar marqum týystarynyń beiitin qorshai almai júrgenderin aitty. Sebebi beiitke jaqyn ornalasqan úi ieleri oǵan qarsy bolyp otyr, - dep habarlaidy Tengrinews.kz tilshisi.
Áńgime Qarasai aýdanyndaǵy Kóksai aýlyndaǵy zirat týraly. Bul jerde turǵyn úilerge jaqyn ornalasqan zirattar bar.
"Turǵyn úiler zirat aimaǵy men onyń shekarasynda ornalasqan. Tórt almatylyq olardyń marqum týystary jatqan beiitti qorshamaq bolǵan. Biraq zirattyń janynan úi salyp alǵan adamdar oǵan qarsy. Olar tipti qorshaýǵa múmkindik bermei otyr. Olardyń úiiniń janyna adam jerlengenin qalamaitynyn aitady. Onda olar nelikten zirattyń janynan úi aldy, jalpy kim jáne qandai negizde memakt berdi?", - deidi advokat Qymbat Almasova.
Onyń aitýynsha, turǵyndarǵa akt berilgenniń ózinde olar zirat shekarasynan ótpeýi kerek edi. Advokat byltyr tamyzda sanitariialyq-epidemiialyq talaptar bekitilgenin atap ótti. Talap boiynsha, zirat pen turǵyn úi arasy 300 metrden kem bolmaýy qajet. Bul araqashyqtyq sanitariialyq-qorǵaý aimaǵy dep atalady.
"Ýákiletti organ jer telimin satatyn kezde marqumdardyń týysynyń múddesin eskerýi kerek edi jáne jer ýchaskesiniń ielerin eskertýi kerek edi. Biz barlyq norma men zań buzylyp zirat mańynan jer berilgenin tekserýimizge negiz bar dep oilaimyz. Olardyń úii ziratqa óte jaqyn ornalasqan, bul durys emes.
Antikorrýptsiia qyzmetine bergen ótinishimiz únsiz qaldy. Odan bólek, Irgeli aýyldyq okrýginiń ákimdigine bardyq. Biraq jaýap ala almadyq", - deidi Qymbat Almasova.
Irgeli aýyldyq okrýgi ákimdiginiń ókilderi zirat olardyń balansyna jatatynyn aitty. Vedomstvo málimetinshe, ziratqa jaqyn ornalasqan jer ýchaskeleri 2013 jyly Qarasai aýdany ákimdiginiń sheshimimen berilgen.
"Biraq jer ýchaskeleri aýyldyq okrýgtiń shetinde ornalasqan", - delingen okrýg ákimi Abylai Ysqaqov qol qoiǵan jaýapta.
Sondai-aq, Qarasai aýdanynyń aýyl sharýashylyǵy jáne jer qatynastary bólimindegi jaǵdaiǵa qatysty túsinikteme berdi.
"Sanitariialyq-qorǵaý aimaǵynda turǵyn úi jáne qoǵamdyq ǵimarat salýǵa bolmaidy. Jer qatynastary salasyndaǵy máselelerdi retteý ákimderdiń quzyretine jatady", - dedi vedomstvo ókilderi.
