Almatylyqtar kópqabatty úidiń qabyrǵasyna ilingen oiynhana jarnamasyna narazylyq bildirdi. Qalalyq ákimdik bul jaǵdaiǵa qatysty túsinikteme berdi, dep habarlaidy "Ult aqparat".
Almatylyq Aliona Plýjnikova Facebook áleýmettik jelisindegi «Dejýrnyi po gorodý» tobynda oiynhana jarnamasyna qatysty jazba jariialady.
«Byltyr Maqataev kóshesindegi turǵyn úige ilingen jarnama banneri alyp tastaldy. Biraq biyl qaitadan ornyna ilip qoiypty. Mundai jarnamany turǵyn úiler qasbetine ilýge bol ma, bul zańdy ma?», - dep jazdy ol.
Almaty qalalyq josparlaý jáne ýrbanistika basqarmasy Medeý aýdany ákimi apparatyna tirkelmegen bannerdi joiý týraly hat joldaǵandaryn atap ótti.
«Abattandyrý erejelerine sáikes barlyq nysannan (ǵimarattar men qurylystar qasbeti, dúkender jáne t.b.) ruqsatsyz ornalastyrylǵan aqparattyq habarlamalardy, jazýlar men beinelerdi joiý, sondai-aq zańnamany buza otyryp ornatylǵan aqparattyq bannerlerdi joiý jumystary Almaty aýdandary ákimi apparatyna, nysannyń menshik ielerine nemese jalǵa alýshy tulǵaǵa júkteledi», - dep habarlady basqarmadan.
