Almaty ákimdigi ǵimaratyn órtten keiingi tazartý jumystary jalǵasyp jatyr. Búgin kómekke qalanyń volonterleri keldi, dep habarlaidy QazAqparat.
HAQ qoǵamdyq qozǵalysynyń jetekshisi Toǵjan Qojalievanyń aitýynsha, senbilikke túrli uiymdardan 150-den astam erikti jumyldyryldy.
«Atap aitar bolsam, «Qyzyl krest», «Jansaia Ábdimálik shahmat akademiiasy», Lider.kz, HAQ qoǵamdyq qozǵalysy, «Narkostop», «Jas Otan» jastar qanatynyń músheleri, sondai-aq kaskaderlar men Almaty qalasynyń qamqor azamattary jumyldyryldy. Olardyń barlyǵy aldyn ala jazyldy, bizde tizim bar. Olar óz erkimen keldi, qalany qalpyna keltirýge úles qosqysy keledi. Kóbinese jastar. Bul óte qýantady. Biz ákimdik ǵimaratynyń úshinshi qabatyn tazalap jatyrmyz», - deidi Toǵjan Qojalieva.
Spikerdiń sózinshe, basty maqsat – kúshimiz birlikte ekenin kórsetý.
«Biz elimizge, súiikti qalamyzǵa kómekteskimiz keledi», - dep qosty ol.
Aita keteiik, 13 qańtarda órtten keiin ákimdik ǵimaratyn tazartý jumystary bastaldy. Oǵan shamamen 660 adam jumyldyryldy. Qiraǵan jihaz, keńse tehnikasy, qoqys jinalyp, kádege jaratý úshin poligondarǵa shyǵarylady.
Buǵan deiin QazAqparat tilshileri órtengen qala ákimdiginiń ǵimaratynda bolyp, nysannyń syrty men ishin kórsetken bolatyn.
Jaily qalalyq orta basqarmasynyń basshysy Sapar Nurashev órtten zardap shekken qalalyq ákimdik ǵimaraty qashan qalypqa keltiriletinin aitty.
Onyń aitýynsha, qazirgi ýaqytta ǵimarat ishinde órt saldarynan tazartý jumystary júrgizilip jatyr. Buǵan shamamen eki-úsh kún ketedi. Jumys kólemi óte úlken. Aldaǵy ýaqytta ony 100 paiyz qaita qalpyna keltiremiz. Tehnikalyq tekserý júrgiziledi. Oǵan taǵy 10 kún ketedi. Osydan keiin mamandar ǵimaratty qalpyna keltirý boiynsha jobalaý-smeta qujattamasyn ázirleidi.
Qalpyna keltirý jumystary shamamen 5-6 aiǵa sozylady. Biýdjet áli anyqtalǵan joq
