Almatydaǵy fizika-matematika baǵytyndaǵy Nazarbaev Ziiatkerlik mektebiniń 12-synyp oqýshysy Alima Tuiaqaeva Oksford ýniversitetimen qatar álemge áigili ýniversitetterdiń biri Aivi Ligasynan Pensilvaniia ýniversitetine oqýǵa resmi shaqyrtý aldy, dep habarlaidy QazAqparat.
Mekteptiń baspasóz qyzmeti málim etkendei, Alima tolyq qarjylandyrý grantynyń iegeri retinde Wharton School of Business mektebinde biznes jáne marketing mamandyǵy boiynsha oqýdy josparlap otyr. Bul oqý orny AQSh biznes mektepteri arasynda keńinen tanymal.
Pensilvaniia ýniversitetinde qazaqstandyq oqýshy qyz jetekshi praktikter men biznes kóshbasshylarynyń lektsiialaryn tyńdaýǵa, neiromarketing boiynsha innovatsiialyq zertteýlerge qatysýǵa jáne jetekshi kompaniialarda taǵylymdamadan ótýge múmkindik alady. Onyń Ilon Mask pen Ýorren Baffetti qosa alǵanda, kúshti túlekteri bar.
Alimanyń anasy qyzy kishkentaiynan bastamashylyq tanytyp, mekteptiń qoǵamdyq ómirine belsene aralasyp, volonterlikpen de ainalysyp kele jatqanyn aitty. Ol kóptegen olimpiadalarǵa qatysyp, jeńimpaz atanǵan.
Oqýshy Instagram–daǵy paraqshasynda ata-anasyna, ustazdaryna, dostaryna qoldaý kórsetkeni úshin alǵysyn bildirdi.
«Men bul ýniversitetti nelikten tańdaǵanymdy aityp bere alamyn. Ol jaqqa barǵym kelgeni sonshalyq, kúndiz-túni oiymnan shyqpaityn. Birneshe jyl boiy ýniversitetimniń oqýǵa túskenderge jibergen hattaryn oqyp kelemin. Tipti jatqa bilem. Biraq búgingi hattyń mazmuny múlde basqa. «It’s time to celebrate» «Toilaýdyń ýaqyty keldi» degen jazýdy kórip, jylap jiberdim», - dep jazdy Alima.
Aita keteiik, Aivi ligasy — Amerika Qurama Shtattarynyń soltústik-shyǵysyndaǵy jeti shtatta ornalasqan segiz jeke amerikandyq ýniversitetterdiń birlestigi. Ligadaǵy ýniversitetter bilim sapasynyń joǵarylyǵymen erekshelenedi.
