QR Memlekettik qyzmet isteri agenttiginiń Almaty qalasy boiynsha departamenti memlekettik qyzmetshilerdi rotatsiialaý jáne aýystyrý jóninde engizilgen ózgeristerdi túsindirý boiynsha onlain vebinar ótkizdi, dep habarlaidy "Ult aqparat".
Vebinar barysynda QR Memlekettik qyzmet isteri agenttiginiń Almaty qalasy boiynsha departamentiniń basshysy Dastan Sekenov saiasi qyzmetshilerdi rotatsiialaý institýtynyń engizilgenin atap ótti. Buǵan deiin rotatsiia tek ákimshilik qyzmetshilerge qoldanǵan bolatyn.
«Iaǵni, ákimdiktiń basqarma basshylarynyń aimaqaralyq rotatsiiasy engizildi (buryn olardy rotatsiialaý bir ákimdiktiń ishinde bolatyn). Alaida atalǵan rotatsiialaý Agenttiktiń kelisimimen júzege asyrylady, iaǵni ákimdikterde komandalyq aýysymdarǵa jol bermeý kózdelgen»,– dedi departament basshysy.
Sonymen qatar, ol belgili bir basshylyq laýazymdardy, onyń ishinde ár túrli memlekettik organdarda jumys istegen «B» korpýsy qyzmetshilerin erikti rotatsiialaý engizilgenin jetkizdi.
«B» korpýsy qyzmetshilerin memlekettik organnyń ishinde aýystyrýǵa múmkindik berildi. Iaǵni, memlekettik qyzmetshiler memlekettik organnyń ishinde aýysý tártibimen teń laýazymǵa aýysýǵa jáne sol memlekettik organda sońǵy eki jylda tómengi laýazymda jumys ótili bar bolǵan jaǵdaida joǵarǵy laýazymǵa aýysýyna bolady»,– dedi ol.
Rotatsiianyń negizgi maqsaty – memlekettik organdardyń tiimdiligin arttyrý, sybailas jemqorlyq quqyq buzýshylyqtardyń aldyn-alý, sondai-aq qyzmetshilerdiń kásibi áleýeti men basqarýshylyq tájirbiesin damytý jáne tiimdi paidalaný.
Aita keteiik, Memleket basshysy 13 qarasha kúni memlekettik qyzmet salasynda qarastyrylǵan keibir aktilerge ózgerister engizý týraly Jarlyqqa qol qoidy.
