Almaty Memlekettik qýyrshaq teatry Kanada memleketi Ottava qalasynda ótken I-shi Halyqaralyq «Ottava» qýyrshaq teatrlar festivaline tuńǵysh ret qatysyp, «Romeo men Djýletta» qoiylymy úshin Gran-Pri júldesine ie boldy!
Soltústik Amerika materigininde ornalasqan, jer aýmaǵy boiynsha dúniejúzi elderi arasynda ekinshi orynda ornalasqan, tabiǵaty men mádenieti kúlli álem boiynsha kóptegen adamdardy qyzyqtyratyn Kanada memleketiniń astanasy Ottava qalasynda tuńǵysh ret I-shi Halyqaralyq «Ottava» qýyrshaq teatrlar festivali jazdyń shýaqty da kórikti shilde aiynda ótkizildi. Kanadalyq kórermenderge dúniejúziniń qýyrshaq ónerlerin tanystyryp, halyqaralyq shyǵarmashylyq pen yntymaqtastyqty kózdegen mádeni is-sharaǵa elimizdiń kók týyn ustap qatysqan alǵashqy qazaqstandyq óner órdasy Almaty Memlekettik qýyrshaq teatry boldy. Atalmysh teatrdyń shyǵarmashylyq ujymy festival aiasynda kanadalyq kórermenderdiń nazaryna óz repertýaryndaǵy erekshe qoiylymdardyń biri, aǵylshyn dramatýrgy Ýiliam Shekspirdiń áigili tragediiasy jelisimen sahnalanǵan, názik te taza mahabbattyń qudiretin sezdiretin «Romeo men Djýletta» spektaklin usyndy.
Qýyrshaq teatrynyń repertýaryndaǵy «Romeo men Djýletta» spektakli 2019 jyly belgili rejisser Dina Jumabaevanyń jetekshiligimen jaryqqa shyqty. Eresekterge arnalǵan bul qoiylym óziniń erekshe qýyrshaqtarymen jáne sahnalyq sheshimderimen premerasy ótkizilgen kezden bastap kópshilik kórermender men teatr synshylarynyń joǵarǵy baǵasyn ielengen edi. Birtalai halyqaralyq jáne respýblikalyq deńgeidegi teatr festivalderinde de baq synap, bul qoiylym qýyrshaq teatrynyń abyroiyn asqaqtatqan. Mysaly, 2022 jyly atalmysh spektakl Bolgariia Respýblikasy Varna qalasynda ótken halyqaralyq «Altyn delfin» qýyrshaq teatrlar festivalinde úzdik dep tanylyp «Gran-pri» júldesine, «Eń úzdik er adam» júldesine, «Eń úzdik debiýt» júldesine laiyqty bolǵan. Al oǵan deiin 2021 jyly Qaraǵandy qalasynda ótkizilgen jáne kóbine otandyq dramalyq teatr ujymdary qatysqan Áshirbek Syǵai atyndaǵy «Syn – shyn bolsyn» respýblikalyq teatrlar festivalinde I-shi oryndy jeńip alǵan. Sonymen qatar «Romeo men Djýlettanyń» ózge de festivaldik jetistikteri men jeńisteri jetip jatyr.
Kórkemdik deńgeiiniń joǵary bolýyna bailanysty kanadalyq kórermen nazaryna usynǵan bul qoiylym memleket astanasynyń ortalyǵynda ornalasqan Ottava Ýniversitetiniń «Academic Hall» sahnasynda 3-i jáne 4-shi shilde kúnderi sahnalandy. Kanadalyq azamattar da, atalmysh elde turyp jatqan otandastarymyz ben qandastarymyz da spektakldi tamashalap, zor qoshemet pen jyly lebizderin bildirdi.
Qazaqstan Respýblikasynyń Kanadadaǵy Tótenshe jáne Ókiletti Elshisi Dáýletbek Qusaiynov festival aiasynda qýyrshaq teatryna qoldaý bildirip, «Romeo men Djýletta» spektaklin tamashalap: «Bizdiń jastar óte joǵary deńgeide jumys kórsetti jáne óte qyzyq mahabbat hikaiasyn sezindirdi. Óz daryndaryn, jalpy qazaq jastaryna tán talantty Kanada halqyna tanystyrdy», – dep baǵalap ótti.
Al Kanadanyń Qazaqstan Respýblikasyndaǵy Tótenshe jáne Ókiletti Elshisi Alan Hamson bolsa: «Artisterdiń tamasha ónerine kýá boldym. «Romeo men Djýlettanyń» osy bir interpritatsiiasy bizdi qatty tańǵaldyrdy!», – dep pikir bildirdi.
Festival sońynda Almaty Memlekettik qýyrshaq teatrynyń «Romeo men Djýletta» spektakli eń úzdik ári eń tabysty dep tanylyp, «Gran-Pri» júldesine ie boldy. I-shi Halyqaralyq «Ottava» qýyrshaq teatrlar festivali aiasynda qýyrshaq teatrynyń artisteri qazaq qýyrshaq óneriniń, qazaq teatry óneriniń, jalpy qazaq halqynyń ónerliligin sahna tórinde asqaqtatyp, zor shabytqa keneldi.
