Almaty ákimi Baýyrjan Baibek kópbalaly analarmen kezdesti, dep habarlaidy "Ult aqparat" qala ákimdiginiń baspasóz qyzmetine silteme jasap.
Qala basshysy kóp balaly analardyń barlyq suraqtary men usynystaryn jeke tyńdady, sonymen qatar megapolistiń turmysy tómen kópbalaly otbasylaryna qoldaý kórsetý úshin qalalyq deńgeide atqarylatyn áleýmettik sharalardy keńinen túsindirdi.
Buryndary mundai kezdesýler barlyq aýdandyq ákimdikterde ótti, nátijesinde aitylǵan barlyq usynystar jinaqtaldy ári saralandy. Jalpy, kópbalaly analardy tolǵandyratyn basty máseleler – áleýmettik járdemaqy mólsherin arttyrý, turǵyn úi men turmystyq jaǵdaidy jaqsartý, eńbekpen qamtý, balalardy bala baqshaǵa ornalastyrý jáne basqalary.
«Memleket basshysynyń tapsyrmasy boiynsha úkimettik top jumys isteýde, kezdesýlerde aitylǵan barlyq usynystar saralanady jáne esepke alynady. Bulardan ózge, biz qalalyq deńgeide kópbalaly analarǵa qoldaý kórsetýdiń naqtyly mehanizmi jinaqtalǵan pármendi sharalardy «Nur Otan» partiiasynyń kezekten tys konferentsiiasynda ashyp aittyq. Mysaly, kámeletke tolmaǵan 4 jáne odan da kóp balalary bar turmysy tómen otbasylarǵa turǵyn úi alýdyń alǵashqy jarnasynyń tólemin sýbsidiialaý múmkindigi qarastyrylatyn bolady», - dedi Baýyrjan Baibek.
Turmysy tómen kópbalaly otbasylarǵa qoldaý kórsetýdiń keshendi sharalary boiynsha múgedek balany úide oqytýǵa ketetin shyǵynnyń ornyn toltyrý úshin beriletin adrestik kómek pen qiyn ómirlik jaǵdai týyndaǵan kezde bir ret kórsetiletin áleýmettik kómek kólemin arttyrý josparlanǵanyn atap ótýge bolady.
Aita keterligi, Baýyrjan Baibek buryndary turmysy tómen kópbalaly otbasylardyń ekinshi balasynan bastap bala baqsha shyǵynyna ótemaqy tóleýdi qarastyrýdy tapsyrǵan bolatyn. Kópbalaly otbasylardyń kommýnaldy qyzmetke, sýmen qamtýǵa qatysty ystyq jáne sýyq sý eseptegish qondyrǵylaryn ornatýǵa ketken shyǵyndaryna jumsalatyn adrestik kómek kólemi de nazarǵa alynýda.
Kóp balaly otbasylardyń zańnamalyq jáne psihologiialyq keńesterge zárý ekeni belgili, sondyqtan taiaý arada «Baqytty otbasy» qalalyq jobasy iske asady jáne osy attas kópbalaly analar ortalyǵy qurylady. Bul bir tereze qaǵidasy boiynsha jumys isteitin servistik ortalyq bolady jáne munda kópbalaly analar jumysqa tartylady.
Almaty ákimdigi turmysy tómen otbasylar úshin áleýmettik jumys oryndaryn ulǵaitý jáne stipendiia beriletin tegin qysqa merzimdi kýrstar uiymdastyrý mumkindigin qarastyrýda.
Buryndary Baýyrjan Baibek Almatyda negizsiz shyǵyndardan arylýdy usynǵan edi. Qala basshysy áleýmettik sipaty bar sheshimder qabyldaý úshin Almaty ákimdiginiń «Nur Otan» partiiasy fraktsiiasynyń múshelerimen birge biýdjet shyǵyndaryn turaqty tekserip, ońtailandyrý júrgizgenin aitty. Nátijesinde únemdelgen qarjy burynǵydai azamattardyń ótinishi boiynsha áleýmettik máselelerge jumsalady. Olar – jańa jumys oryndaryn qurý, turmysy tómen jandarǵa, ásirese kóp balaly analarǵa qoldaý kórsetý spektrin ulǵaitý, basqa áleýmettik sharalardy júzege asyrý.
