Uly Otan soǵysynyń maidangeri Shinkarev Ivan Afanasevich búkil soǵysty bastan ótkerdi, 17 jasynda áskerge shaqyryldy, pýlemetshi boldy, Baltyq elderinde soǵysyp, úsh ret jaraqat alyp, elge oraldy.
Ivan Afanasevich 98 jasqa tolar aldynda insýlt alyp, bas miynyń trombozynan týyndaǵan tserebraldy infarkt diagnozymen Almaty №4 qalalyq klinikalyq aýrýhanasynyń nevrologiialyq bólimshesine shuǵyl túrde jatqyzyldy.
«Tańǵy as kezinde qolynan kesesin túsirip alǵanda, ardagerdiń nemereleri onyń jaǵdaiynyń nasharlaǵanyn túsindi, sodan keiin ol sóilei almady. Jaqyndary ony shuǵyl túrde №4 qalalyq klinikalyq aýrýhananyń nevrologiialyq qabyldaý bólimine jetkizdi. Munda ony nevropatolog, terapevt jáne reanimatolog mamandar birlesip tekserdi. Qabyldaý bóliminde biz bas mi tomografiiasyn jasap, naýqasty mamandandyrylǵan bólimshege jatqyzýdy uiǵardyq. Onyń túsken kezdegi jalpy jaǵdaiy júrek jáne tserebraldy jetkiliksizdikke bailanysty aýyr dep baǵalandy», - deidi nevrologiia bólimshesiniń meńgerýshisi Dinara Muhanǵalieva.
Dárigerler konservativti emdeý týraly sheshim qabyldady, óitkeni naýqasta kóptegen qatar júretin sozylmaly patologiia boldy jáne kez kelgen hirýrgiialyq aralasýdyń ardager úshin qaýpi joǵary boldy. Kún saiyn mamandar maidangerdiń densaýlyq jaǵdaiy men negizgi kórsetkishterine klinikalyq, zerthanalyq jáne aspaptyq zertteýler júrgizdi. Naýqasty kúndelikti terapevt, nevropatolog jáne kardiolog dárigerler qarap turdy.
Tórtinshi qalalyq aýrýhananyń emdeýshi dárigeri, nevropatolog Jáńgir Ábdiev atap ótkendei, EKG, bas miǵa KT, ehokardiografiia, aiaq-qol tamyrlaryna ÝDZ, keýde qýysy múshelerine KT kórsetkishteri únemi baqylaýda boldy.
Emdeý nátijesinde Ivan Afanasevichtiń jaǵdaiy turaqtalyp, saýyǵa bastady, al 10 kúnnen keiin 98 jasqa tolǵan kúni ardager aýrýhanadan shyǵaryldy.
«Biz tamaqta as tuzyn shekteýdi usyndyq - bul insýlt pen infarkt qaýpin 19-20%-ǵa tómendetedi. Kalii men magniige bai jemis pen kókónisti kóbirek jeýdi usyndyq. Taǵamǵa teńiz ónimderin engizgen durys. Janýar mailaryn tutynýdy azaitqan jón. Naýqas qan qysymyn, qandaǵy qantty únemi baqylaýdy qajet etedi jáne ýchaskelik dáriger usynǵan dári-dármekti kúndelikti qabyldaýdy umytpaýy kerek. Jeke tańdalǵan dári-dármekti únemi qoldaný insýlt qaýpin taǵy 40%-ǵa tómendetedi», - dep atap ótti emdeýshi dáriger, №4 qalalyq klinikalyq aýrýhananyń nevropatology, Jáńgir Ábdiev.
Ivan Afanasevichti úide úlken otbasy - 2 balasy, 4 nemeresi jáne 8 shóberesi kútedi.
