Almatylyq kelinshek balasynyń oń kózine jasalýy tiis otany sol kózine jasady dep dárigerlerdi aiyptady, dep habarlaidy QazAqparat.
Bul týraly qazaqstandyq bloger Aidyn Toqsanbaeva áleýmettik jelidegi paraqshasynda aitty.
«Balammen birge Manas, 40 mekenjaiynda ornalasqan «Balalar shuǵyl meditsinalyq ortalyǵyna» kvota arqyly kózine operatsiia jasatý úshin jattym. Onyń oń kózinde kista bolǵan. Ol keiin túsip qaldy. Dárigerler túbinde tamyry qalyp ketti, sony alý kerek dedi. Kvotamen kelip otyrmyz. Keshe túnnen bastap eshteńe jegizbei, ishkizbei, tańerteń balany alyp ketti. Endi oń kózine jasalýy kerek bolǵany otany sol kózine jasap ákelip tur», – deidi Aidyn Toqsanbaeva.
Almaty qalalyq densaýlyq saqtaý basqarmasynyń málimetinshe, 4 jastaǵy patsient josparly túrde balalar shuǵyl meditsinalyq ortalyǵynyń oftalmologiia bólimine jatqyzylǵan.
«Operatsiia bólmesinde narkoz salynyp, oń jaq qabaǵyna tekseris júrgizilgen. Onda ózdiginen túsken haliazionnyń orny bolǵan, hirýrgiialyq aralasýdy qajet etpedi. Hattamaǵa sáikes, sol jaq qabaǵyn tekserip, kishi kólemdegi haliazion anyqtaldy. Jasalǵan anesteziiany eskere kele haliaziondy alyp tastaý týraly sheshim qabyldandy. Solai jasaldy», – dep túsindirdi basqarmadan.
Qazirgi ýaqytta balanyń jaǵdaiy birqalypty. Em qabyldaý oftalmologiia bólimi jaǵdaiynda jalǵasady.
