Foto: Polisia.kz
Almatylyq áiel 80 myńdai AQSh dollaryn internet-alaiaqtarǵa aýdaryp jibergen, – dep habarlaidy "Ult aqparat" Polisia.kz portalyna silteme jasap.
55 jastaǵy K.esimdi azamatsha alaiaqtar tobynyń qylmystyq jelisine túsip qalǵan. Belgili bolǵandai, ol bir aptadai qylmyskerlerdiń talaptaryn oryndap kelgen. Olardyń óziniń jinaǵan aqshasyn qorǵaýǵa tyrysyp jatqanyna senimdi bolǵan.
– Qaskóiler 21 qazanda uialy telefon arqyly jábirlenýshige qońyraý shalǵany anyqtaldy. Olardyń biri ózin bank qyzmetkerimin, ekinshisi politseimin dep tanystyrdy. Ekeýi de onyń shotyna belgisiz bireýler shabýyl jasaǵanyn aityp, aqshany odan ári “qaýipsiz shotqa” salý úshin “bank mamanyna” tapsyryp, saqtaýdy usynǵan. Sodan keiin áiel adam, beitanys adamǵa 74 707 AQSh dollar men 1,3 mln teńge bergen. Kelesi kúni K.esimdi azamatshaǵa taǵy da “bank qyzmetkerleri” telefon soǵyp, 2 mln teńge kóleminde nesie alýǵa kóndirgen. Áiel qaskóilerdiń bul talabyn da oryndaǵan. Tek 1 qarashada ǵana alaiaqtardyń qurbany bolǵanyn túsinip, politsiiaǵa júgingen, – dedi Medeý aýdandyq Politsiia basqarmasynyń bastyǵy Dáýren Ótebaev.
Atalǵan derek boiynsha QR QK-niń 190-baby 4-bóligi 2-tarmaǵy boiynsha qylmystyq is tirkelip, jedel-tergeý toby quryldy.
– Qabyldanǵan sharalar nátijesinde úsh adam anyqtalyp, ustaldy. Olar 24 jastaǵy S.esimdi azamat, 26 jastaǵy A.esimdi azamat jáne 27 jastaǵy S.esimdi RF azamaty. Kúdiktilerdiń jalǵa alǵan keńsesinde 20 uialy telefon nómiri jáne ártúrli ekinshi deńgeili bankterde ashylǵan 52 bank kartasy tabylyp, tárkilendi. Jaýap alý kezinde ustalǵan adamdar qarajatty qolma-qol aqshaǵa ainaldyrýmen, kriptovaliýtaǵa aiyrbastaýmen ainalysatyndaryn, bul isten óz paidasyn alatyndaryn moiyndady. Qazirgi ýaqytta qylmystyń basqa da sybailastary, sondai-aq basqa da yqtimal epizodtardy anyqtaý boiynsha jedel jáne arnaiy is-sharalar júrgizilýde. Kúdiktiler qamaýǵa alyndy, – dedi Ótebaev.
Sonymen qatar, Almaty qalasynyń prokýratýrasy osyǵan uqsas epizodtardy boldyrmaý úshin azamattardy saqtyq pen qyraǵylyqqa shaqyrady.
