Almatylyq atqysh Igor Dýjnov bankke ǵana emes, tanystaryna da qaryzyn qaitarmai júrgen, - dep habarlaidy Tengrinews.kz.
Almaty qalalyq soty málimetine súiensek, Dýjnov aqsha alyp, qaitarmaǵan tanystary ony alty ret sotqa bergen. Sondai-aq, 18 ret jeke sot oryndaýshylary ony sotqa jaýapker retinde shaqyrǵan. Budan bólek, taǵy toǵyz ret almatylyq atqyshtyń múlkine tyiym salýǵa jáne májbúrlep sotqa keltirýge tyrysqan.
"2014-2021 jyldary Igor Dýjnov alty azamattyq is boiynsha sotta jaýapker bolǵan. Ol uzaq ýaqyt boiy qaryzyn ótemegen: keibireýleri úsh, al basqalary úshin alty jyl. Sondyqtan eki adam odan jalpy somasy 6,5 million teńge qaryzdy óndirip alý úshin júgingen. Sonymen qatar, JSSh bes million teńgeni qaitarý týraly jáne bank 118 million teńgeni qaitarý týraly talap aryz bergen", - dedi Almaty qalalyq soty baspasóz qyzmetiniń mamany Nursultan Orynbasarov.
Onyń aitýynsha, úsh sot sheshimi boiynsha Dýjnovtan 130 millionǵa jýyq teńge óndirilgen. Biraq ol taǵy úsh is boiynsha aiyptalýshy. Bul - banktiń "múlikti óndirip alý týraly" talaby, sonymen qatar azamattardyń "erli-zaiyptynyń ortaq qaryzy retinde somany taný jáne onyń otbasyn shyǵarý týraly" eki talaby.
"27 ret sot oryndaýshylary sotqa júgindi. Olar Dýjnovtyń múlkine tyiym salýdy jáne aqshany májbúrlep qaitarý úshin basqa da sharalardy qoldanýdy talap etti. Sot oryndaýshylary boryshkerdiń ortaq menshiktegi úlesin anyqtaýdy surady. Sonymen qatar, olar sot sheshimin oryndaý úshin ádis pen protsedýrany ózgertýdi surady", - dep tolyqtyrdy Orynbasarov.
Aita keteiik, 20 qyrkúiekte keshke Almatyda atys boldy. 54 jastaǵy er adam úiden shyǵarý týraly sot sheshimin oryndaýǵa kelgen sot oryndaýshysyna, politsiia qyzmetkerlerine jáne aýlada bolǵan ózge eki adamǵa ańshy myltyǵynan oq jaýdyrǵan. Nátijesinde bes adam qaza tapty. Eki politsiia qyzmetkeri, bir jeke sot oryndaýshysy jáne eki turǵyn. Olardyń biri - úidiń jańa iesi, ekinshisi - onyń tanysy.
1967 jyly týǵan kúdikti ustaldy. Ol 20 jylǵa nemese ómir boiyna deiin bas bostandyǵynan aiyrylýy múmkin.
