Foto: gov.kz
Almaty qalasynyń arnaiy prokýrorlary esirtki zattarynyń asa iri kólemdegi kontrabandasy faktisi boiynsha sotqa deiingi tergep-tekserýdi aiaqtady dep habarlaidy Ult.kz qalalyq prokýratýraǵa silteme jasap.
Tergeý barysynda jazasyn penitentsiarlyq mekemede ótep jatqan sottalǵan adam Amerika Qurama Shtattarynan Almatyǵa esirtki quraly - marihýana men kannabis syǵyndysy salynǵan sálemdemelerdi jetkizý arnasyn uiymdastyrǵany anyqtaldy.
Qylmystyq áreketke uiymdastyrýshylar, kýratorlar, qamqorshylar, dropperler, jasyryn belgileýshiler jáne ólshep oraýshylar tartylǵan.
Jedel is-sharalar nátijesinde «Jetisý» keden beketinde salmaǵy 43 kg quraityn marihýana men kannabis syǵyndysy salynǵan 25 sálemdeme tárkilendi. Olar is boiynsha zattai dáleldemeler dep tanyldy.
Tergeý jáne jedel-izdestirý is-sharalarynyń kesheni, sondai-aq sot saraptamalarynyń nátijeleri, aiyptalýshylardyń quqyqqa qarsy qyzmetin rastady.
20 kúdikti, onyń ishinde ulttyq qaýipsizdik organynyń 2 qyzmetkeri jáne qylmystyq toptyń qyzmetine qamqorlyq kórsetken QR IIM QAJK-niń 3 qyzmetkeri ustaldy.
Is boiynsha aiyptalýshylarǵa esirtki zattaryn kontrabandalaǵany jáne satqany, sondai-aq laýazymdyq qylmystary úshin jaýaptylyqty kózdeitin baptar boiynsha aiyp taǵyldy.
Zańsyz qyzmetten alynǵan tabysty kúdiktiler jyljymaityn múlikti, jer ýchaskelerin jáne avtokólik quraldaryn satyp alý jolymen zańdastyrǵan. Sottyń sanktsiiasymen 5 páterge, 3 qurylysqa, 10 jer ýchaskesine jáne 44 avtokólik quralyna tyiym salyndy.
30.09.2025 j. qylmystyq isi máni boiynsha qaraý úshin Qylmystyq ister jónindegi mamandandyrylǵan aýdanaralyq sotyna joldandy.
Almaty qalasynyń prokýratýrasy esirtki quraldarynyń zańsyz ainalymy aýyr qylmys bolyp tabylatynyn jáne qatań túrde qylmystyq jaýaptylyqqa tartylatynyn eskertedi. Óziniń jeke derekterin úshinshi tulǵalarǵa berý kezinde saqtyq tanytýdy eske salamyz.
