"Almatyelektrkólik" jol apatyna ushyraǵan ekinshi avtobýs júrgizýshisiniń jaǵdaiyn aitty, - dep habarlaidy Tengrinews.kz.
Qalalyq tasymaldaýshy kompaniia málimetinshe, №201 avtobýstyń júrgizýshisi qoly synyp, №4 qalalyq aýrýhanaǵa jatqyzyldy. Qoǵamdyq kólik júrgizýshisi retindegi eńbek ótili - 10 jyl, kompaniiada 2021 jyldyń 19 naýryzynan bastap jumys isteidi.
Júrgizýshiniń jasy 59-da. Kompaniia júrgizýshi jaman ádetteri joq, jaýapty qyzmetker ekenin aitty.
"Almatyelektrkólik" JShS avtobýstar tejegishteriniń isten shyqqandyǵy týraly aqparatqa da pikir bildirdi.
"2022 jyldyń 23 qyrkúieginde №201 marshrýttyń avtobýstarynyń sany arttyrylyp, jańartyldy. LiAZ markaly 18 avtobýstyń ornyna 2022 jyly qurastyrylǵan Golden Dragon markaly 24 avtobýs jolǵa shyǵaryldy. Shara jolaýshylar tarapynan suranystyń artýyna bailanysty qoldanyldy.
Avtobýstar aýystyrylǵannan keiin júris intervaly 12 minýttan 6-7 minýtqa deiin qysqardy. Avtobýstar biyl mamyr aiynda satyp alyndy, qazirgi kezde shyǵarýshy zaýyttyń kepildemesinde, tehnikalyq aqaýlary joq, tehnikalyq túiinderi men agregattary, sondai-aq tejegishteri aqaýsyz jumys atqaryp tur", - delingen habarlamada.
Eske salaiyq, jol apaty Tóle bi kóshesi men Abylai han dańǵylynyń qiylysynda bolǵan. Apat saldarynan bir adam qaza taýyp, 17 adam aýrýhanaǵa jetkizilgen jáne bir adam meditsinalyq kómekten bas tartqan.
Adam ólimine ákep soqqan jol-kólik oqiǵasy deregin tekserip jatqan Almaty qalalyq PD anyqtaý basqarmasy málimetinshe, JKO syzbasyna jáne beinebaqylaý júieleriniń taldaýyna sáikes, saǵat 14:05-te jeke tasymaldaýshylardyń birine tiesili "MAZ-203069" qoǵamdyq kóliginiń júrgizýshisi 1987 jyly týǵan A. esimdi er adam, Abylai han dańǵylymen ońtústik baǵytta kele jatyp, Tóle bi dańǵylynyń qiylysynda baǵdarshamnyń tyiym salynǵan belgisine ótip ketip, Tóle bi dańǵylymen shyǵys baǵytta kele jatqan "GOLDEN DRAGON XML6125CN" markaly qoǵamdyq kólikpen soqtyǵysqan.
Bul derek QR QK-niń 345-baby 3-bóligine sáikes sotaldy tergeýdiń biryńǵai tizilimine tirkelgen. Tiisti saraptamalar taǵaiyndaldy.
