Almaty ákimi Baqytjan Saǵyntaev Memleket basshysynyń joldaýyn júzege asyrýǵa arnalǵan qala aktiviniń otyrysynda strategiialyq mańyzdy infraqurylymdyq jobalardy iske asyrý týraly aitty, dep habarlaidy QazAqparat.
Megapoliste 2020-2024 jyldarǵa arnalǵan «Jańa Almaty» keshendi damý josparyn iske asyrý jalǵasatyn bolady. Oǵan jyl saiyn shamamen 200 mlrd teńge bólinedi. Josparǵa qala shetindegi kólik, biznes, áleýmettik infraqurylymdy jaqsartý boiynsha 286 joba kiredi.
Memleket basshysy óz Joldaýynda ekologiialyq máselelerdi sheshý qajettigin atap ótti. Baqytjan Saǵyntaevtyń aitýynsha, sońǵy 11 jylda jyljymaly kózderden shyǵatyn zalaldy zattar aitarlyqtai tómendedi – 128 myńnan 70 myń tonnaǵa deiin jáne jeke sektordan 16 myńnan 1 myń tonnaǵa deiin.
Almatydaǵy ekologiialyq jaǵdaidy jaqsartýdaǵy basty máseleniń biri-JEO-2 men JEO-3 gazǵa kóshirý. Sonyń arqasynda zalaldy qaldyqtar 7,5 esege – jylyna 50 myńnan 6,7 myń tonnaǵa deiin tómendeidi.
Aýanyń lastanýyn boldyrmaý, eń aldymen kólikterden shyǵatyn zalaldy zattardy azaitý úshin qalanyń kireberisterine 12 ekologiialyq post ornatyldy, onyń 9-y turaqty jumys isteidi. Sondai-aq, úsh mobildi post pen jyljymaly ekologiialyq zerthana satyp alynady.
Qalany kógaldandyrý boiynsha aýqymdy jumystar júrgizilip jatyr. «Jasyl Almaty» baǵdarlamasy boiynsha qazirdiń ózinde 480 myńnan astam aǵash otyrǵyzyldy. Kúzde 350 myń aǵash otyrǵyzý josparda. Jalpy, 2022 jyldyń sońyna deiin 1 million aǵash otyrǵyzý kózdelgen.
