Ótken demalys kúnderi besinshi Almaty jartylai marafony ótti. Jarysqa barlyǵy 5 500 áýesqoi sportshy qatysty. Olardyń arasynda 200-ge jýyq sportshy álemniń 28 elinen kelip qatysty, dep habarlaidy QazAqparat.
Sheteldik qatysýshylardyń kópshiligi TMD elderinen, alaidy Ulybritaniia, AQSh, Avstraliia siiaqty memleketterden kelgender de bar.
Aita keterligi, qorytyndy boiynsha absoliýtti esepte Máskeýden kelgen jartylai marafonshy jeńil atletikadan halyqaralyq dárejedegi sport sheberi Rinas Ahmadeev jeńimpaz atandy. Onyń máre ýaqyty - 1 saǵat 5 minýt 11 sekýnd, bul Almaty jartylai marafony trassasynyń 21.1 km-degi jańa absoliýtti rekord.
«Elimizde ótetin marafondar álem saiystarynyń kartasyna túsip, halyqaralyq is-sharalar deńgeiine shyqqanyna óte qýanyshtymyn. Bul jaǵdai ishki týrizmge serpin berip qana qoimai, syrttan keletin týrister úshin de tartymdy oqiǵaǵa bolmaq», - dedi jarysty uiymdastyrýshy Saltanat Qazybaeva.
«Mundai is-sharalar qazaqstandyq jáne sheteldik týristerdiń nazaryn aýdarady. Sondyqtan sońǵy birneshe jyldary osyndai is-sharalardyń uiymdastyrýshylaryn barynsha qoldaýǵa tyrysyp júrmiz. Mysaly, Business Media Central Asia kórme holdingimen, «Birinshi bolý – batyldyq» qorymen birlesip, osy jyldyń maýsym aiynda elordada «Qazaqstan Live Fest» is-sharasyn ótkizýdi josparlap otyr», - dedi Kazakh Tourism ulttyq kompaniiasynyń Basqarma tóraǵasy Talǵat Amanbaev.
Kazakh Tourism baspasóz qyzmetiniń habarlaýynsha, Qazaqstan Live Fest-týrizm, sport jáne belsendi ómir saltyna arnalǵan jańa shara. Festival aiasynda 2022 jyldyń 19 maýsymynda alǵashqy astanalyq Nur-Sultan Half Marathon jartylai marafony bastaý alady. Marafonnyń máresi men sóresi «EXPO» halyqaralyq kórme ortalyǵynyń aýmaǵynda ótedi.
