Almaty biligi qala kóshelerinde qandai ózgerister jasaitynyn málimdedi. Bul týraly búgin Almaty ákimdiginde ótken baspasóz brifing barysynda aityldy, dep habarlaidy "Ult aqparat".
Atap aitqanda, Jandosov kóshesi keńeiip, BRT ekinshi kezegine jobalyq-smetalyq qujattama ázirlenedi. Sain kóshesi uńǵylanyp sozylatyn boldy.
«BRT birinshi kezeńinde Jandosov kóshesiniń Súleimenov pen Úlken Almaty ózenine deiingi bóligi qalyp qoiǵan bolatyn. Shamamen 1 shaqyrym jol edi. Bul ýchaskede jospar boiynsha joldyń enin keńeitý kózdelgen. Atalǵan bólikte jol qozǵalysy 6 jolaqta júrgiziledi. Naqtyraq aitqanda, kósheniń oń jaǵy keńeitiledi. Sol jerdegi úilerdiń 90%-y satyp alyndy. Bolashaqta olar súriledi», - dedi qalalyq Mobildilik basqarmasy basshysynyń orynbasary Ernur Ábjahan.
Onyń aitýynsha, BRT jelisiniń ekinshi kezeńi Timiriazev-Jeltoqsan kósheleriniń qiylysynan Qulja tas jolyndaǵy Jetisý bazaryna deiin 13 shaqyrymǵa sozylady.
«Sain kóshesi Rysqulov pen Móńke bi kósheleriniń aralyǵyna deiin 3,2 km sozylatyn boldy. Osy maqsatta jekemenshik ielerinen jer ýchaskelerin satyp alý kózdelgen. Qazir baǵalaý jumystary júrip jatyr. Bul jumystar 2020 jylǵa deiin aiaqtalýy tiis bolatyn. Alaida barlyǵy qarjylandyrýǵa, jer ýchaskelerin satyp alý uzaqtyǵyna bailanysty», - dedi Ernur Ábjahan.
