Almatyda 16 jastaǵy jasóspirim 18 jastaǵy mektep túlegin óltirdi degen kúdikpen ustaldy, dep habarlaidy "Ult aqparat".
Qalalyq IID baspasóz qyzmetiniń habarlaýynsha, atalǵan derek boiynsha QR QK 99-babynyń 1-bóligi boiynsha M.Áýezov aýdandyq IIB-de sotqa deiingi tergeý amaldary júrip jatyr.
«Atalǵan qylmysty jasady degen kúdikpen 16 jastaǵy jasóspirim qalalyq IID ýaqytsha oqshaýlaý ornyna qamaldy. Ol qylmys jasaǵanyn moiyndady», - dedi qalalyq IID baspasóz qyzmetiniń jetekshisi Saltanat Ázirbek.
Sonymen qatar, politsiia qylmysqa qatysy bolýy múmkin degen adamdardy anyqtaý úshin tergeý júrgizýde.
Almatydaǵy № 173 litseidiń basshylyǵy Janur Baiqonys mekteptiń burynǵy oqýshysymen tóbeleskennen keiin qaza tapqanyn aitady.
Muǵalimderi marqumnyń sabyrly, salmaqty bolǵanyn jáne qytailyq JOO-ǵa túsýdi josparlaǵanyn, birneshe til biletinin aityp otyr. Janur Baiqonys UBT tapsyrýdan bas tartyp, Qytaiǵa ketkisi kelipti.
«Janur biyl mektep bitirdi, úzdik emes, biraq «4» pen «5»-ke oqyǵan. Aǵylshyn, orys, nemis jáne qytai tilderin bildi. Biyl ol UBT-dan bas tartyp, Qytaiǵa ketkisi kelgen. Dostary Janurdyń 20 tamyzda Qytaiǵa attanǵaly jatqanyn aitty. Sabyrly, salmaqty bala edi. Jekpe-jekke shyǵyp, tóbelesken», - dedi №173 mektep-litseiiniń ákimshiligindegiler.
Janur Baiqonysty óltirdi degen kúdikti odan bir synypqa tómen oqyǵan jáne № 173 mektep-litseiinde oqyǵan. Muǵalimderdiń málimetinshe, olar buǵan deiin janjaldaspaǵan. TJ keshki ýaqytta bolǵan.
«Ekinshi balanyń ata-anasy osy aýdannan baspana satyp alyp, ony bizge jetinshi synypta alyp kelgen, segizinshi synypta ol basqa mektepke aýysty», - dedi litseidegiler.
Búgin «Aqsai» ýniversitetindegi emhana bas dárigeriniń orynbasary Shaherizada Ahashevanyń 18 jastaǵy uly kisi qolynan mert bolǵany belgili boldy.
Balanyń ólimi jaily S.Asfendiarov atyndaǵy Qazaq Ulttyq meditsinalyq ýniversitetiniń saitynda jazyldy. Dárigerdiń áriptesteri onyń qaiǵysyna ortaqtasyp, kóńil aitqan.
«S.Asfendiarov atyndaǵy Qazaq Ulttyq meditsinalyq ýniversitetiniń ujymy «Aqsai» ýniversitettik emhanasynyń bas dárigeriniń orynbasary Shaherizada Ahashevanyń 18 jastaǵy balasy Janurdyń qaza bolýyna bailanysty qaiǵyryp kóńil aitamyz. Jannur biyl mektep bitirip, joǵarǵy oqý ornyna túsken bolatyn», - delingen jazbada.
