Almaty turǵyny Gaýhar Kárimbekova 5 qańtarda 12 jasar uly Sultannyń ólimine sebep bolǵan oqiǵa týraly aityp berdi, - dep habarlaidy Tengrinews.kz.
Gaýhardyń aitýynsha, 4 qańtarda otbasymen qala syrtynda ata-anasynyń úiinde túnegen. Jaqyn týystar arasynda jieniniń týǵan kúnin toilaǵan. Olar 5 qańtarda tańerteń Almatyǵa oralǵan.
"Otbasy bolyp atap óttik, tipti teledidar qaraǵan joqpyz. Ol jaqta Internet nashar. Uiyqyǵa jaqanymyzda ákemiz film kórip jatqan. Biz tipti jańalyqtardy da kórmedik. 5 qańtarda tańerteń, tańǵy altylar shamasynda jolǵa shyqtyq, jumysqa barar jol uzaq, Sultan da jattyǵýǵa barýy kerek boldy. Miting ótip jatqanyn bilmedik, biraq Sultannyń uiqysy qanbǵandyqtan, úide qalýyn ótindim. Ol jańajyldyq úzilisten keiin fýtbolǵa barýǵa qulshynyp turdy.
Avtobýsty 40 minýt kúttik, biraq kelmedi. Batysta gazǵa bailanysty narazylyqtar bolyp jatqanyn estigenmin, avtobýs júrgizýshileri ereýilge shyqqan shyǵar dep oiladym. Internet jumys istemedi. Citybus-ta avtobýstar joq (Almatydaǵy qoǵamdyq kólikterdi qadaǵalaýǵa arnalǵan qosymsha - esk.). Biraq keiin bul jelidegi problemalar dep oiladyq. Telefonymdy óshirip, qostym. WhatsApp-qa eshkim jazbaǵanyna tańǵaldym. Taksi ustap, jolǵa shyqtyq", - deidi áiel sol kúngi oqiǵany bólisip.
Jol jónekei áiel aialdamalarda kóp adam turǵanyn kórgen, biraq ol demonstranttardy nemese tártipsizdikterdi kezdestirmegen.
Qalada olar Gaýhardyń inisiniń úiine kirgen. Sýyqtan onyń telefony óship qalǵan. Telefonyn qýattap, jumysyna - № 26 qalalyq emhanaǵa qońyraý shalǵanda ǵana Gaýhar mitingiler týraly esitigen, biraq báribir barýǵa bel býǵan.
"Men jolǵa shyǵyp, taksi ustadym. Jumysta jaǵdaidy talqylaýǵa ýaqyt bolmady, jumys kóp boldy. Jańalyqtardy oqýǵa tyrystym, mitingter bolǵanyn kórdim, biraq buryn da qalada mitingiler bolǵan. Keshki beste jumystan bosadym. Internet istemei, bankomat izdep jaiaý kóshege shyqtym. Tóle bi kóshesin jaǵalap júrdim, qazir sol jaqtan órtengen kólikterdi kórsetip jatyr. Ol kezde ondai bolǵan joq. Bankomat tappadym da, inime oraldym. Keshke, tamaqtanyp bolǵan soń, taǵy da bankomat izdeýdi uiǵardyq, sonymen qatar erteńge azyq-túlik alamyz dep oiladyq. Inim birge shyqty, al kishi ulym Sultan bizben birge barǵysy keldi.
Jaýapsyz ekenimdi aitatyn shyǵarsyz, "mitingiler ótip jatqanyn bilip, balamen kóshege shyqty" dersiz. Biraq 5 qańtarda oq jaýdyryp, balalarǵa oq atqany boldy ma? Jalpy, buryn sońdy mundai boldy ma? Qanshama mitingiler boldy. Mitingter osyndai aýqymda ótetinin bilgenimde, ózim de shyqpas edim", - deidi Gaýhar.
Qaiǵyly oqiǵa áieldiń esinde emis-emis qalǵan. Kóp dúnieni inisi artynan aityp bergen.
"Erteńine Semeige baratyn poiyzǵa bilet bolǵan. Jolǵa aqsha men azyq-túlik kerek boldy. Saǵat 20.20 shamasynda úiden shyqtyq. Bankomatqa bara jatqanda, ol jumys istemei turǵanyn aitty. Dúkenge tym bolmasa nan alaýǵa baraiyq dedik. Biraq ol da jabyq. Janymyzda kórshiler bar edi, bireý satýshyǵa telefon soqpaqshy boldy. Sol jerde kútip turdyq. Kenet shý bastalyp ketti. Bireýler otshashý atylyp jatqanyn aitty. Áýezov politsiia bólimi jaqqa qarasam, jarq-jurq, tarsyldaǵan dybystar shyǵyp ketti. Men ómirimde atysty kórgen emespin.
Olar otshashý týraly aita bastaǵanda, balam sýretke túsirý úshin telefonyn kóterdi. Oǵan burylǵanymda, teris qarap turǵan. Endi eńkeie bergenimde, ulym jerge qulap tústi. Basynda ne bolǵanyn túsinbedim, súrinip qulaǵandai boldy. Basynan qan aǵyp jatqanyn kórgende aiǵailap jiberdim. Keiin ne bolǵany esimde joq. Sultan túsirip úlgergen video kadryna qaraǵanda oq saǵat 20.49-da atylǵan. Dál sol kezde ulyma oq tigen", - dedi Gaýhar.
Áiel bireý-mireý jedel járdem shaqyrǵany esinde joq ekenin aitty.
"Men múldem eshteńe istemedim. Tek aiǵailai berdim. Qalǵany esimde joq. Bir er adam kelip, meni tynyshtandyrýǵa tyrysqan. Biraq ol da esimde joq. (...) Kórshi úidiń áielderi meni podezge aparyp, shyǵarmai qoiǵany esimde. Sol kezde inim júgirip kelip, Sultan tiri ekenin aitty. Men biraz tynyshtaldym. Ol jetinshi aýrýhanaǵa qabyldamady dedi me, álde qabyldamaidy dedi me, biraq ekinshi qalalyq balalar klinikalyq aýrýhanasyna aparǵan.
Inim kólikterdi toqtatpaq bolǵanyn, biraq eshkim toqtamaǵanyn aitty. Ol: "Men jolǵa júgirip shyǵyp, kóliktiń ústine shyǵyp, toqtattym", - deidi. Biraq balam aýrýhanaǵa jetip, sol jerde qaza boldy", - dedi balanyń anasy.
Áiel ulyn atqan qylmyskerlerdi tapqysy keletinin aitty, biraq qazir ol jerde ne bolǵany týraly eshqandai nusqa joq.
"Ádette shý qaidan shyǵyp jatqany belgili bolady. Basymdy kótergende, politsiia bólimshesiniń tóbesinen oq jaýdyryp jatyr eken dep oiladym. Sol jerde adamdar júrdi. Terezelerde jaryq joq, tek qara kiingen adamdar júrdi. Meniń oiymsha, sol jerden, biraq shynynda qalai boldy, men bilmeimin. Basqa eshkimdi kórmedim. Janymyzda qarýly adamdar bolǵan joq. Eshkim kele jatqanyn kórmedim.
Politsiia bólimine shabýyl jasalsa da, onda qorshaý qandai ekenin bilesiz be? Kirpish, biiktigi eki metr, odan da joǵary bolmasa. Múmkin ishinde birdeńe bolǵan shyǵar, bilmeimin. Biraq ishinde bolmadyq. Tipti sol jaqta da emes. Biz joldyń arǵy jaǵynda, tipti qarama-qarsy da emes, Tóle bige qarai tómenirek turdyq.
"Mynalar atyp ketti" dep qazir naqty aita almaimyn. Men ne bolǵanyn da bilmeimin. Tek ýákiletti organdar ne bolǵanyn aitsa eken deimin. Bireý ne bolǵanyn aitqanyn qalaimyn. Ony umytyp ketetin nárse emes qoi. Meniń jaýapkershiligim, árine, ata-ana retinde bar. Biraq memlekettiń jaýapkershiligi de bar ǵoi", - dep bólisti Gaýhar.
Áleýmettik jelide balanyń qolyndaǵy kamerada jaryq qosylyp qalýy múmkin degen boljamdar aitylyp jatyr. Áiel ol esinde joq ekenin túsindirdi, biraq mundai nusqany joqqa shyǵarmady.
Jerleý 7 qańtarda ótti. Gaýhardyń aitýynsha, onyń aǵasy politsiiaǵa aryz jazǵan.
"Oqiǵa ornyna atam - kúieýimniń ákesi, inilerim bardy. Men ol jaqqa bara almadym. Bir ret tergeýshi keldi. Biraq odan keiin eshkim kelmedi, eshteńe suramǵan joq. Beisenbide qalaǵa balamnyń qaitys bolǵany týraly anyqtamany alýǵa bardym. Sol kezde ákimdikten adamdar kelgenin aitty. Er adam úige kirmegen, syrttan ákimdikten ekenin aityp, qaida jumys isteitinimdi suraǵan", - dedi Gaýhar.
Anasynyń aitýynsha, Sultan 7 jeltoqsanda 12 jasqa tolǵan. Ol kásibi fýtbolshy bolýdy armandaǵan eken.
"Qanshama adam keledi, bári ony qatty jaqsy kórdi. Ol meiirimdi, sabyrly, jastaiynan parasatty, aqyldy. Jaýapty, jaqsy oqydy. Synyptaǵy balalar ony matematik dep ataityn. Ol matematikany óte jaqsy kóretin. Bárin qorǵap júretin. Tipti aǵasyn da qorǵaýǵa tyrysatyn.
Kózderi janyp turatyn. Ol shynymen ómir súrgisi keldi, onyń josparlary boldy. Ol birneshe jyl fýtbol oinady. Ataqty fýtbolshy bolǵysy keldi. Ol qatty tyrysty", - dedi Gaýhar.
Eske salaiyq, dál qazir Almatydaǵy tártipsizdik kezinde eki bala qaza tapqany belgili. 12 jasar Sultannan basqa 4 jasar qyz qaza bolǵany habarlanǵan bolatyn.
