Marqumnyń anasy men ápkesi /©EK/Jansaia TÁÝEKELQYZY
Almatyda toǵyzynshy qabattan úsh balasymen sekirgen áieldiń ápkesi marqumnyń kóz jumar aldynda jazǵan hatynyń ekinshi bóligi týraly aityp berdi, dep habarlady Sputnik Qazaqstan agenttigi "Ekspress K" saityna silteme jasap.
"Bul ómirdiń máni joq. Ómir súrgim kelmeidi. Meni keshirińder. Kináliler ózi biledi" dep jazdy ol. Meniń oiymsha mundaǵy kináliler kúieýi men onyń týystary. Óitkeni Baqytgúl taǵy bir áieldiń bary týraly bildi. Hattyń ekinshi betine ol úlken kempirqosaqtyń sýretin salyp, meniń telefon nómirimdi úsh ret jazǵan. "Bul jaǵdai týraly ápkeme aityńyzdar. Men ony jaqsy kóremin. Tek ápkem ǵana maǵan meiirimdi" dep jazyp ketipti ol", - deidi Baqytgúldiń ápkesi.
Janar Qydyrbaevanyń aitýynsha, sińlisiniń óliminen keiin onyń kúieýi qońyraý shalyp, politsiiaǵa eshteńe aitpaýdy ótingen.
"Shyn máninde Baqytgúl otbasylyq problemalary týraly eshkimge tis jarǵan emes. Ol kúieýine jala da jaqpady. Tamyz aiynda maǵan qońyraý shalyp, kúieýi kózine shóp salyp júrgenin aitty. Ol áieldiń esimi - Elvira. Aralarynda janjal shyqqan. Kúieýi oǵan sol áielden tek aqsha kerektigin, otbasy men balalary bárinen qymbat ekenin aitqan. Barlyǵy jaqsy bolatynyna ýáde bergen. Baqytgúldiń ózin jáne balalaryn óltirý týraly oiy bolmaǵan. Bizdiń oiymyzsha oǵan kúieýi sebepker boldy. Ol qyzǵanysh pen ókpeden ózine qol saldy", - deidi Janar.
Onyń aitýynsha, qazir hat politsiianyń qolynda.
Janar Qydyrbaeva sińlisiniń kúieýi qumar oiynǵa da áýes bolýy múmkin ekenin aitty.
"Úilerinen fishkalar men kartalardy jii kóretinmin. Onyń býma-býma aqsha ustap júrgenine de kýá bolǵanmyn. Alaida Baqytgúl onyń qaida jumys isteitini týraly eshqashan aitpaǵan", - deidi ol.
Buǵan deiin marqumnyń tólenbegen úsh krediti bary týraly aitylǵan. Sońǵy ret áiel qazanda 15 myń teńge onlain kredit alǵan. Alaida ony qaitara almaǵan. Taǵy eki kredit te tólenbei jatqan.
Kúieýi Nursultan Orazov jumyssyz qalǵandyqtan ony tólei almaǵanyn aitqan bolatyn. Ol bazarda, qurylysta túrli jumystar atqarǵan, turaqty jumysy bolmaǵan.
Áiel úsh balasymen terezeden sekirip ketti
Almatyda 22 qarasha Jetisý-1 shaǵyn aýdanyndaǵy kópqabatty úilerdiń birinde 28 jastaǵy áiel úsh balasymen birge 9-qabattan sekirip ketti. Tórteýi de kóz jumdy.
Almatylyq kelinshek óler aldynda hat qaldyrǵan. Ol synaqqa shydai almaǵanyn, kinálilerdiń ózi biletinin aitqan.
Almaty qalasynyń politsiia departamenti qaiǵyly jaǵdaidyń aldyn ala sebebin habarlady.
"Bul áreketke otbasylyq-turmystyq qarym-qatynas kezinde kúieýi ekeýiniń arasyndaǵy janjal sebep bolǵan", - delingen politsiia habarlamasynda.
Jedel-tergeý toby quryldy. Oqiǵa boiynsha Qylmystyq kodekstiń ("Óz-ózine qol jumsaýǵa jetkizý") baby boiynsha tergeý júrgizilip jatyr.
