Almatyda ótken onlain brifing barysynda 20-21 maýsymdaǵy shekteý sharalaryn qai jaǵdaida odan ári jalǵasatyny aityldy, dep habarlaidy QazAqparat.
«Biz bul ahýaldy jiti baqylap otyrmyz. Eger aýrý kórsetkishi táýligine 7 %–ten asatyn bolsa, karantin sharalary odan ári jalǵasatyn bolady», - dedi qalanyń bas sanitarlyq dárigeri Jandarbek Bekshin.
Onyń aitýynsha, qazir qalada sońǵy 10 kúnde aýrý kórsetkishi 5% bolyp tur. Qala biligi osy kórsetkishti 1%-ke deiin tómendetýdi maqsat tutyp otyr.
«Alaida barlyq qaýip - simptomsyz naýqastardyń ósýinde. Sonymen qatar, qaladaǵy tósek oryndardyń 95 paiyzy tolyp otyr. Iaǵni kóbeigen jaǵdaida aýrýhanada oryndar jetispeýi múmkin», - dedi J.Bekshin.
Almaty qalasynyń bas sanitarlyq dárigeri qalaǵa oblystan kiretinderge jáne shyǵatyndarǵa shekteý bolmaitynyn aitty.
Onlain brifing barysynda jýrnalister qalada blokpostar qoiyla ma degen saýal qoiǵan bolatyn.
«Joq. Qala syrtynda blokpostar qoiylmaidy. Turǵyndar qalaǵa, oblysqa emin erkin kirip shyǵa alady», - dedi J.Bekshin.
Aita ketý kerek, búgin QR Premer-Ministri Asqar Maminniń tóraǵalyǵymen QR aýmaǵynda koronavirýs infektsiiasynyń taralýyna jol bermeý jónindegi vedomstvoaralyq komissiianyń (VAK) selektorlyq otyrysy ótkenin jazǵan edik. Onda QR Prezidenti Qasym-Jomart Toqaevtyń tapsyrmasyna sáikes Qazaqstandaǵy epidemiologiialyq jaǵdaidy turaqtandyrý boiynsha qosymsha sharalar qaraldy.
