QR Densaýlyq saqtaý vitse-ministri Qamaljan Nadyrov Ortalyq qalalyq klinikalyq aýrýhana basshysynyń jumystan ketýine bailanysty túsinik berdi, dep habarlaidy "Ult aqparat".
«Meditsinalyq uiymnyń basshysy – qoǵamdyq densaýlyq saqtaý basqarmasynyń quzyryndaǵy shtattyq birlik. Meniń bilýimshe, bas dáriger óz erkimen ótinish jazdy. Biz sizdermen quqyqtyq memlekette ómir súrip jatyrmyz. Eńbek kodeksin de, memlekettik qyzmetkerge degen qarym-qatynasty da bilemiz. Sondyqtan, eger bireýde qandai da bir suraq týyndaǵan bolatyn bolsa, biz olardy quqyqtyq alańda qarastyrýymyz kerek», - dep túsindirdi Q.Nadyrov.
Eske sala ketsek, 14 sáýirde Almaty qalasy Qoǵamdyq densaýlyq saqtaý basqarmasy basshysynyń buiryǵymen Almaty qalalyq ortalyq aýrýhanasynyń meńgerýshisi Almas Bolatuly Jývashev qyzmetinen bosatylǵan edi.
Meditsinalyq uiym basshysynyń mindetin búgingi tańda Marat Abdýllaev atqaryp jatyr.
