قر دەنساۋلىق ساقتاۋ ۆيتسە-مينيسترٸ قامالجان نادىروۆ ورتالىق قالالىق كلينيكالىق اۋرۋحانا باسشىسىنىڭ جۇمىستان كەتۋٸنە بايلانىستى تٷسٸنٸك بەردٸ, دەپ حابارلايدى "ۇلت اقپارات".
«مەديتسينالىق ۇيىمنىڭ باسشىسى – قوعامدىق دەنساۋلىق ساقتاۋ باسقارماسىنىڭ قۇزىرىنداعى شتاتتىق بٸرلٸك. مەنٸڭ بٸلۋٸمشە, باس دەرٸگەر ٶز ەركٸمەن ٶتٸنٸش جازدى. بٸز سٸزدەرمەن قۇقىقتىق مەملەكەتتە ٶمٸر سٷرٸپ جاتىرمىز. ەڭبەك كودەكسٸن دە, مەملەكەتتٸك قىزمەتكەرگە دەگەن قارىم-قاتىناستى دا بٸلەمٸز. سوندىقتان, ەگەر بٸرەۋدە قانداي دا بٸر سۇراق تۋىنداعان بولاتىن بولسا, بٸز ولاردى قۇقىقتىق الاڭدا قاراستىرۋىمىز كەرەك», - دەپ تٷسٸندٸردٸ ق.نادىروۆ.
ەسكە سالا كەتسەك, 14 سەۋٸردە الماتى قالاسى قوعامدىق دەنساۋلىق ساقتاۋ باسقارماسى باسشىسىنىڭ بۇيرىعىمەن الماتى قالالىق ورتالىق اۋرۋحاناسىنىڭ مەڭگەرۋشٸسٸ الماس بولاتۇلى جۋۆاشەۆ قىزمەتٸنەن بوساتىلعان ەدٸ.
مەديتسينالىق ۇيىم باسشىسىنىڭ مٸندەتٸن بٷگٸنگٸ تاڭدا مارات ابدۋللاەۆ اتقارىپ جاتىر.
