Almatyda ótken baspasóz brifingi barysynda qalalyq Kásipkerlik jáne investitsiialar basqarmasynyń basshysy Erkebulan Orazalin maskalar men zararsyzdandyrý quraldarynyń óndirisi týraly aityp berdi, dep habarlaidy QazAqparat.
«Almaty oblysynda óndiristik kásiporyn jumys istep tur. Zaýyt aiyna 3 mln maska óndire alady. Bul ónimniń mańyzdylyǵy artýyna bailanysty óndiris qazir SK «Farmatsiia» arqyly kelisimshartpen júzege asyrlyp jatyr. Óndiristiń keibir bóligi Almatyǵa jiberiledi. Qalǵany el óńirlerine kelisimshart boiynsha beriledi. Zaýyt kúnine 100 myń maska shyǵarsa, onyń 60 myńy Almatyǵa jiberilse, qalǵany óńirlerge taratylady. Biraq, bizde tapshylyq týyp otyr. Ony jasyrmaimyz», - dedi Erkebulan Orazalin.
Osyǵan bailanysty atalǵan kásiporynnyń óndiristik qýatyn arttyrý kózdelip otyr.
«Dúisenbige deiin jańa qondyrǵy jetkizilip, óndiris qýatyn aiyna 8 mln maskaǵa kóterý kózdelip otyr. SK «Farmatsiia» basshylarymen sóilestik. Maska ainalasyndaǵy alypsatarlyqty boldyrmaý úshin kásiporynǵa ainalym qarajatyn quiyp beretin bolamyz. Olar sol qarajatqa shikizat alady. Bul óz kezeginde bizge qaladaǵy iri dárihanalarmen tikelei jumys isteýge múmkindik beredi», - dedi Erkebulan Orazalin.
Ol sonymen qatar antiseptik pen sanitaizerler týraly da aitty.
«Bul ónimderdi óndiretin kásiporyndy da ainalym qarajatyn bólip qoldaityn bolamyz. Jaqyn arada qosymsha óndiristi iske qosamyz. Keler aptada bólshek saýda naryǵynda taýar tapshylyǵyn sheship, halyq arasyndaǵy alasapyrandy toqtatamyz dep oilaimyz. Sonymen qatar, maska jáne basqa da quraldardy satyp alýda shekteý qoiýdy oilastyryp jatyrmyz. Óitkeni, keibir tulǵalar býma-býma satyp alyp, ary qarai satyp, paida kórýdi oilaidy», - dedi basqarma basshysy.
Munyń aldynda qala ákiminiń orynbasary, arnaiy shtab basshysy Erjan Babaqumarov qalada maska óndirisin keńeitýdi qolǵa alǵanyn aitqan bolatyn.
Almatyda koronavirýs áli eshkimde zerthanalyq deńgeide rastalǵan joq.
