Almatyda dárigerler Jetisý aýdanynda bolǵan gaz ben aýa qospasynyń jarylysynan zardap shekken adamdardyń jaǵdaiy týraly aitty, dep habarlaidy "Ult aqparat".
Zardap shekken úsh adamnyń biri - 23 jastaǵy er adam aýrýhanadan shyǵýǵa daiyndalyp jatyr.
«Patsient denesiniń 22% kúiik shalǵan. Qazirgi jaǵdaiy qanaǵattanarlyq. Aýrýhanadan shyǵýǵa daiyndalyp jatyr», - dedi qalalyq Qoǵamdyq densaýlyqty saqtaý basqarmasynan.
Al 19 jastaǵy boijetkenniń jaǵdaiy asa aýyr.
«2000 jyly týǵan qyz áli de jansaqtaý bóliminde. Jaǵdaiy óte aýyr. Jasandy tynys alý apparatyna qosylǵan. Denesiniń 85%-y kúigen. Qazir ótkir kúiik toksemiiasy kezeńin basynan keshirip jatyr», - dedi basqarma.
Eske salsaq, qaiǵyly jaǵdai Pervomaika aýylyndaǵy Postyshev, 64 «V» mekenjaiynda barak tiptes 3 qabatty úide bolǵan edi.
Saldarynan 3 adam jaraqat alyp aýrýhanaǵa túsken bolatyn. Denesiniń 100 %-yn kúiik shalǵan 36 jastaǵy er adam 2 kúnnen soń kóz jumdy.
