Foto: Ashyq derekkóz
Almatyda úsh adamnyń ómirin qiǵan avtoýs apatyna qatysty sot otyrysy ótip jatyr, dep habarlaidy «Ult aqparat» KTK arnasyna silteme jasap.
Zardap shekken tarap aiyptalýshy men avtopark ókilderinen 20 mln teńge kólemindegi ótemaqyny talap etip otyr. Alaida olar týystarynan aiyrylǵandardyń talabymen kelispei otyr.
Al avtobýs júrgizýshi Ermek Shókebaeva ózin soqqyǵa jyqqan sottalýshyǵa beiádep sózder aitpaǵanyn aityp aqtalýda.
Aita keteiik, Joǵarǵy sottyń sheshimimen bul is boiynsha protsess te onlain rejimde kórsetiledi.
Jábirlenýshilerdiń talap-aryzymen aiyptalýshy Darhan Ahmetjanov birden kelispeitinin aitty. Qoǵamdyq kólikke tiesili avtobýs kompaniiasy da 20 mln teńge moraldyq ótemaqyny tólemeimiz dep otyr.
"Qurmetti sot, talap-aryzdy qoldamaimyz. Sebebi qylmystyq is boiynsha biz aiyptalýshy, kúdikti tarap retinde tanylmaǵanbyz. Sol sebepti qoldamaimyz", - deidi avtopark ókilderi.
Kompaniianyń sózimen avtobýs júrgizýshisi de kelisip otyr. Ermek Shókebaeva bul oqiǵada óziniń jábirlenýshi ekenin alǵa tartty. Ári ózin soqqyǵa jyqqan er adamǵa "onyń ashýyn týdyratyndai sózder aitpadym" dep aqtaldy.
"Ahmetjanov maǵan kóp balaǵat sóz aitty. Biraq men ol sózderdiń eshqaisysyn kóńilime ilmedim. "Iá aita ber, aita ber" dedim", - deidi avtobýs júrgizýshisi Ermek Shókebaeva.
Degenmen jantúrshigerlik apattan qaza bolǵan Aidos Álmenbaevtyń jary júrgizýshige ádettegidei óz ýájin aitty. Úsh balasymen jalǵyz qalǵan ana onyń jaýapqa tartylýyn taǵy talap etip otyr.
"Sen osyndai jaǵdaidy týdyrmaýyń kerek edi. Seniń kesirińnen úsh adam qaitys boldy, túsinesiń be, 7 bala jetim qaldy!", - dedi jábirlenýshi Ainur Qusaiynova.
Aiyptalýshy Darhan Ahmetjanov ta tergeý kezinde júrgizýshige qatysty kei derekti jariia etipti. Júrgizýshi er adamnyń uialy telefonyn tartyp alyp, jol aqysyn ózi tólemek bolǵan . Bul áreketi kameraǵa da jazylǵan kórinedi.
"Júrý barysynda júrgizýshi Shókebaeva meniń qolymdaǵy uialy telefonymdy meniń ruqsatymsyz qolymnan tartyp alyp, uialy telefonymnyń birligin tekserip kórdi. Sóitip júrgizýshi Shókebaeva meniń uialy telefonymnan jol júrý aqysy uialy telefonymnyń birligin SMS 9909 arqyly jibere bastady. Alaida jol júrý aqysy ótpedi", - dedi Ahmetjanov.
Aita keteiik, jantúrshigerlik jol apaty jeltoqsan aiynda Raiymbek dańǵylynyń boiynda boldy. №47 baǵyttaǵy qoǵamdyq kólik joldyń jiegindegi bir top adamdy qaǵyp ótip, sonyń saldarynan úsh adam kóz jumdy. Tórteýi túrli jaraqatpen aýrýhanaǵa túsken. Atalmysh oqiǵaǵa qatysty Qylmystyq kodekstiń eki birdei babymen is qozǵalǵan. Kúdikti kináli dep tanylsa, cegiz jylǵa deiin bas bostandyǵynan aiyrylýy múmkin.
