Qalalyq sot Almatyda bes adamdy atyp óltirgen Igor Dýjnovtyń áieli túsirgen shaǵymdy qaraýdy keiinge qaldyrdy, dep habarlaidy QazAqparat.
Anaida Demirchian qalalyq sotqa osyǵan deiin aýdandyq sot keiinge qaldyryp kelgen otbasyn úiden shyǵarý týraly sheshimge qatysty apelliatsiialyq shaǵym túsirdi. Biraq Almaty soty talapkerdiń bolmaýyna bailanysty otyrysty keiinge qaldyrdy. Sebebi, úidiń jańa iesi atys kezinde qaza tapty. Zańǵa sáikes, onyń qaitys bolǵany týraly kýálik qajet.
Bul qujat áli daiyn bolmaǵandyqtan, sot shaǵymdy qaraýdy 5 qazanǵa qaldyrdy.
Aita keteiik, 20 qyrkúiekte keshke Almatyda atys boldy. 54 jastaǵy er adam úiden shyǵarý týraly sot sheshimin oryndaýǵa kelgen sot oryndaýshysyna, politsiia qyzmetkerlerine jáne aýlada bolǵan ózge eki adamǵa ańshy myltyǵynan oq jaýdyrǵan. Nátijesinde bes adam qaza tapty. Eki politsiia qyzmetkeri, bir jeke sot oryndaýshysy jáne eki turǵyn. Olardyń biri - úidiń jańa iesi, ekinshisi - onyń tanysy.
1967 jyly týǵan kúdikti ustaldy. Ol 20 jylǵa nemese ómir boiyna deiin bas bostandyǵynan aiyrylýy múmkin.
