Almatyda avtobýstar jol apatynan zardap shekkenderge City Bus JShS úndeý jasady, - dep habarlaidy Tengrinews.kz agenttigi.
Kompaniia direktory Egor Jiglov avtobýstardyń biri olardyń avtoparkine tiesili ekenin rastady.
"Keshe qalamyzdyń turǵyndary Abylai han dańǵyly men Tóle bi kóshesi qiylysynda jol-kólik oqiǵasynyń kýágeri boldy. Apatqa ushyraǵan avtobýstardyń biri bizdiń kompaniianyń balansynda jáne jolaýshylar men bagajdy tasymaldaýdyń №98 turaqty qalalyq baǵytyna qyzmet kórsetedi", - dedi Jiglov.
Tasymaldaýshy kompaniia zardap shekkender men marqumnyń otbasyna kóńil aitty.
"City-bus JShS atynan jáne jeke óz atymnan qaiǵyly jaǵdaiǵa bailanysty marqumnyń otbasyna kóńil aitamyn. Sondai-aq, osy apatta zardap shekken azamattardyń tezirek saýyǵyp ketýine tilektespin. Bizdiń kompaniia tergeý nátijesin kútpei-aq zardap shekkender men marqumnyń otbasyna barlyq qajetti kómekti kórsetýge daiyn. Qazirgi ýaqytta jedel tergeý sharalary júrgizilip jatyr, oǵan tolyq qatysyp, zardap shekkenderdiń tizimi men olardyń jaǵdaiyn anyqtap jatyrmyz", - dedi Egor Jiglov.
Eske salaiyq, jol apaty Tóle bi kóshesi men Abylai han dańǵylynyń qiylysynda bolǵan. Apat saldarynan bir adam qaza taýyp, 17 adam aýrýhanaǵa jetkizilgen, jáne bir adam meditsinalyq kómekten bas tartqan.
Adam ólimine ákep soqqan jol-kólik oqiǵasy deregin tekserip jatqan Almaty qalalyq PD anyqtaý basqarmasy málimetinshe, JKO syzbasyna jáne beinebaqylaý júieleriniń taldaýyna sáikes, saǵat 14:05-te jeke tasymaldaýshylardyń birine tiesili "MAZ-203069" qoǵamdyq kóliginiń júrgizýshisi 1987 jyly týǵan A. esimdi er adam, Abylai han dańǵylymen ońtústik baǵytta kele jatyp, Tóle bi dańǵylynyń qiylysynda baǵdarshamnyń tyiym salynǵan belgisine ótip ketip, Tóle bi dańǵylymen shyǵys baǵytta kele jatqan "GOLDEN DRAGON XML6125CN" markaly qoǵamdyq kólikpen soqtyǵysqan.
Bul derek QR QK-niń 345-baby 3-bóligine sáikes sotaldy tergeýdiń biryńǵai tizilimine tirkelgen. Tiisti saraptamalar taǵaiyndaldy.
