Almatydaǵy «Altyn Orda» bazary janyndaǵy jol aiyryǵynyń qurylysy qazan aiynda aiaqtalady. Bul týraly «QazAvtoJol» ulttyq kompaniiasynyń bapasóz qyzmeti málim etti, dep habarlaidy QazAqparat.
«Búgingi kúni «Almaty-Bishkek» avtojolynyń 786-790 shaqyrymy aralyǵynda (16-19 shaqyrym «Altyn Orda») «Raiymbek-Almaty» ýchaskesiniń kólik júretin bóligin keńeitý jumystary táýlik boiy júrip jatyr. Qurylysqa 215 jumysshy men 30 tehnika jumyldyryldy», - dep habarlady «QazAvtoJol».
Qazirgi ýaqytta negizgi kúsh magistraldy estakadaǵa baǵyttalǵan.
Atap aitqanda, nysannyń sol jaǵyn betondaý jumystary tolyq bitti. Al oń jaq tusynyń 100 metr aýmaǵyna beton quiyldy.
Sonymen qatar, montajdaý, qalypty ornalastyrý, torlaý jumystary qarqyndy júrip jatyr.
«Estakadaǵy negizgi jumys jospar boiynsha júrgizilýde, kesteden keshigý joq. Nysan qurylysy biylǵy jyldyń qazan aiynyń sońyna qarai aiaqtalady», - dep atap ótti kompaniiadaǵylar.
