Almatylyqtar Qazaqstannyń halyq jazýshysy Qabdesh Jumadilovti aqtyq saparǵa shyǵaryp saldy. Qalamger turǵan úidiń aldyna 200-ge jýyq adam jinalyp, marqumnyń janazasy shyǵaryldy, dep habarlaidy Sputnik Qazaqstan.
Jinalǵandardyń arasynda Qazaqstan jazýshylar odaǵynyń tóraǵasy Ulyqbek Esdáýlet, mádeniet jáne sport vitse-ministri Nurǵisa Daýeshov, Qazaqstan parlamenti májilisiniń depýtaty Qazybek Isa, Almaty qalasy ákiminiń orynbasary Erjan Babaqumarov, Almaty qalasy mádeniet basqarmasynyń basshysy Ǵani Mailybaev qatysty.
Sonymen qatar qalamgerdiń týystary men uly Arman Qabdyrashituly boldy.
Qalamgermen qoshtasý rásiminde alǵashqy sóz Qazaqstan jazýshylar odaǵynyń tóraǵasy Ulyqbek Esdáýletke berildi. Aqyn óz sózinde Qabdesh Jumadilovtiń ótken ǵasyrdyń ekinshi jartysynda bir top qazaqty sońynan ertip, atamekenge oralǵanyn erekshe atap ótti.
"Búkil ǵumyryn eline, jurtyna arnaǵan, qalamynyń qarymyn óz jurtyna jumsaǵan naǵyz jazýshy, qara qyldy qaq jarǵan ádil adam, qajymas qaisar kúresker, aqiqat pen shyndyqtyń jolynda ǵumyryn sarp etken ulttyń abyz aqsaqaly dárejesine kóterilgen abzal aǵamyz edi. (...) Shekaradan Qajytai aǵam (Qajytai Iliias) ekeýi ǵana ótip qoimai, sońynan qanshama júz myń adamdy ilestirip kelip, ózi "Sońǵy kósh" dep at qoiǵan kósh alyp kelip edi. Qazaq degen halyqtyń qataryn toltyryp, kemistigin, olqylyǵyn toltyryp, sanyn kóbeitip, sapasyn arttyrdy. 1950-60 jyldary kelgen qazaqtyń urpaqtary keremet biikterge, memlekettiń týyn tigip, irgesin bekitýge, táýelsizdiktiń nyǵaiýyna eńbek sińirdi", - dedi Esdáýlet.
Ol sondai-aq, Qabdesh Jumadilovtiń jazýshy retinde ereksheligin atady.
"Ol kisiniń basqa jazýshylardan ereksheligi – bir dáýirdi ǵana emes, birneshe dáýirdi qamtyp jazdy. Arǵy tarihty, bergi tarih pen búgingi kúndi jazdy. Ol kisiniń aiqasyp-shaiqasyp aralaspaǵan salasy joq. Qazaqtyń qulap bara jatqan bir shańyraǵyn túzetsem, qisaiyp bara jatqan arbasyn túzetsem degen úlken nietin iske asyryp ketti. Aitqanyn istep, atqanyn tigizdi, degenine jetti dep oilaimyn. Ol kisiniń jete almaǵany bolsa, osynda turǵan urpaqtary sizder jetkizesizder", - dedi Qazaqstan jazýshylar odaǵynyń tóraǵasy.
Qaraly jiynda mádeniet jáne sport ministriniń orynbasary Nurǵisa Daýeshov Elbasy Nursultan Nazarbaev pen mádeniet jáne sport ministri Aqtoty Raiymqulovanyń kóńil aitý hatyn hatyn oqyp berdi.
"Kórnekti qalamger, Qazaqstannyń halyq jazýshysy, Memlekettik syilyqtyń laýreaty Qabdesh Jumadilovtiń ómirden ótýine bailanysty orny tolmas aýyr qaiǵyǵa ortaqtasyp, kóńil aitamyn. Qabdesh Jumadiluly – qarymdy shyǵarmashylyǵy, qajyrly qairatkerligimen qazaq ádebietiniń damýyna qomaqty úles qosqan asa talantty tulǵa bolatyn. Daraboz daryn iesi óziniń mazmuny bai kóptegen áńgimeleri men hikaiattary, keń tynysty epikalyq romandary arqyly ulttyq prozanyń ósip-órkendeýine ólsheýsiz eńbek sińirip, qily zamandarda túrli teperish kórgen qazaq halqynyń talaily taǵdyry men tarihyn, aýmaly-tókpeli tutas dáýirdiń kelbetin qapysyz somdady. Onyń sońynda qalǵan kesek týyndylary – ádebietimizdiń altyn qorynda saqtalatyn shyn mánindegi qundy rýhani qazyna", - delingen Elbasynyń kóńil aitý hatynda.
Qazaqstan parlamenti májilisiniń depýtaty Qazybek Isa qalamgerdiń Muhtar Áýezovke uqsas tustaryn aityp, qazaq ádebitindegi alyptardyń tuiaǵy dep atady.
"Qazaq ádebietindegi alyptardyń sońǵy tuiaqtardyń biri edi. "Sońǵy kóshti" jazyp, sońǵy abyzdarymyzdyń biri boldy. Qalamymen de, qairatymen de ult úshin eńbek etti. Qazaqstannyń halyq jazýshysy degen ataqty alǵan eki-aq qalamger qalǵan edi. Onyń ishinde bir ǵana jazýshy bar edi... Biz Muhtar Áýezovti, Sábit Muqanovty kórgen joqpyz. Al sol Muhtar Áýezovtiń ózindei, ózi bolmasa da kózindei, artyna tastap ketken sózindei, tulǵasy da uqsas Qabdesh Jumadilovti kórdik", - dedi Qazybek Isa.
Ol sondai-aq, eldegi epidemiologiialyq jaǵdai bolmasa, teatr ishine syimai asyl aǵamen qoshtasar edik dep ókinishin jetkizdi.
Aita keteiik, 2020 jyldyń 5 sáýirinde Qazaqstannyń halyq jazýshysy Qabdesh Jumadilov 85 jasqa qaraǵan shaǵynda dúnieden ótti.
Sanaly ǵumyryn ádebiet pen qazaq tiline arnaǵan qalamger 11 roman, 21 povest, 70-ten astam áńgime jazǵan.
Qabdesh Jumadilovke 1998 jyly Qazaqstannyń halyq jazýshysy ataǵy berildi. 1990 jyly "Taǵdyr" romany úshin Abai atyndaǵy memlekettik syilyq berildi.
Marqumnyń súiegi óziniń amanaty boiynsha Shyǵys Qazaqstan oblysy Úrjar aýdany Baqty – Aiagóz tas jolynyń boiyndaǵy beiitke qoiylady.
